Festat e fundvitit, Policia masa për sigurinë publike

Policia e Shtetit, në kuadër të festave të fundvitit, ka hartuar planin e masave “Për garantimin e rritjen e sigurisë publike”, përmes të cilit janë përcaktuar detyra konkrete për strukturat qendrore dhe vendore të policisë, në funksion të rritjes së cilësisë së shërbimit për qytetarët. 

Policia e Shtetit, në një njoftim shtypi, bëri të ditur sot se masat e përcaktuara në këtë plan kanë si qëllim rritjen e sigurisë në shkallë vendi, krijimin e kushteve për zhvillimin normal te aktiviteteve festive, parandalimin e ngjarjeve, menaxhimin në mënyrë sa më cilësore të fluksit të madh të emigrantëve që vijnë në Shqipëri për të festuar dhe të qytetarëve shqiptarë që do të dalin nga Shqipëria si rezultat i liberalizimit të vizave me BE, si dhe rritjen e sigurisë në rrugë dhe ambiente publike. 
Fluksi në Kufi
Masa janë marrë për rritjen e shërbimeve të Policisë Rrugore në segmentet që lidhin vendin tonë me Pikat e Kalimit Kufitar, në linjat ndërqytetëse dhe ato të trafikut në qendrat urbane kryesore, me qëllim parandalimin e aksidenteve rrugore, disiplinimin e mbajtjen nën kontroll te trafikut rrugor dhe ndërhyrjen e menjëhershme në rast të ndodhjes së ngjarjeve automobilistike. 

Një sërë masash janë marrë gjithashtu, me qëllim lehtësimin e proçedurave të përpunimit të personave dhe automjeteve në Pikat e Kalimit Kufitar. Për këtë nga Departamenti për Kufirin e Migracionin është hartuar dhe një plan i veçantë përmes të cilit është parashikuar shtimi i personelit në Pikat e Kalimit me anë të komandimeve të personelit shtesë. Me qëllim planifikimin e shërbimeve për kontrollin e territorit do të bashkëpunohet me autoritetet vendore për t’u njohur me programet apo aktivitetet e festimeve që do të zhvillohen gjatë fundvitit. 
Fishekzjarret 
Ndërkohë që masa të veçanta do të ndërmerren për parandalimin e përdorimit të fishekzjarreve të rrezikshme në netët e festave. Nga Drejtoritë Rajonale të Kufirit e Migracionit dhe Drejtoritë e Policisë në Qarqe janë marrë masa për forcimin e bashkëpunimit me strukturat Doganore e Tatimore, si dhe struktura të tjera, me qëllim bllokimin e fishekzjarreve të rrezikshme për jetën.
Shmangia e incidenteve
Ndërkohë gjatë ditëve të festimeve të fundvitit strukturat e Policisë së Shtetit do të kalojnë në shërbim të përforcuar. Masa të veçanta janë marrë për mbajtjen nën kontroll të elementëve me preçedent kriminal, për parandalimin e ngjarjeve apo akteve të rrugaçërisë, për kapjen e personave në kërkim, për ndjekjen e shpejtë dhe në kohë të ngjarjeve kriminale, si dhe vlerësimin e informacioneve për konflikte të mundshme dhe si rezultat i ardhjes së emigrantëve, duke marrë masa me karakter parandalues. 
Po ashtu janë përforcuar shërbimet e Policisë Kufitare, me qëllim parandalimin e kalimeve të paligjshme të kufirit, kapjen e personave në kërkim, parandalimin e kontrabandës, etj. Gjithashtu do të përforcohen shërbimet policore për ruajtjen e sigurimin e objekteve të rëndësishme shtetërore, si dhe kontrollin me patrullime të objekteve publike e private.  Kujdes i veçantë i është kushtuar zbatimit të kërkesave të Kodit të Etikës së Policisë dhe paraqitjes dinjitoze në punë e publik nga të gjithë punonjësit e policisë. 

Me qëllim sigurimin e ndihmës për shtetasit në nevojë Drejtoritë e Policisë në Qarqe dhe Komisariatet e Policisë janë porositur të marrin masa për afishimin në vende të dukshme të numrave telefonikë të shërbimeve të Sallave Operative. Qytetarët mund të telefonojnë nga çdo vend i Shqipërisë në numrin e telefonit pa pagesë 129, si për të kërkuar ndihmën e policisë, ashtu dhe për raste të abuzimeve e keq sjelljes të punonjësve të veçantë të policisë. 

Ballkanweb.com