Amnesty International: Patronazhistët cenuan të drejtat e njeriut

Baza e të dhënave të votuesve shqiptarë, e cila u bë publike para zgjedhjeve të 25 prillit 2021, përbën cenim të rëndë të të drejtave të njeriut. Në raportin vjetor, Amnesty International nxjerr në pah skandalin e patronazhistëve si dhe rrjedhjen e listës së pagave dhe të dhënave të tjera si raste flagrante të shkeljes së të drejtave të njeriut përgjatë 2021-shit.

Në fillim të prillit, një bazë e paligjshme e të dhënave që mbante të dhënat personale të rreth 900 000 qytetarëve dhe e përdorur nga Partia Socialiste për qëllime elektorale u zbulua disa ditë para zgjedhjeve. Gjithsej 162 qytetarë paditën Partinë Socialiste për shkelje të ligjit për mbrojtjen e të dhënave. Në dhjetor, dy baza të tjera të të dhënave u zbuluan, duke shkaktuar zemërim publik. Ata mbanin të dhëna personale si pagat, vendet e punës dhe llojin e makinës në pronësi të më shumë se 600 000 taksapaguesve.

Në korrik, Gjykata Kushtetuese shfuqizoi disa dispozita të Ligjit për Policinë e Shtetit, të cilat i kishin lejuar policisë të kryente përgjim masiv të qytetarëve pa autorizimin paraprak të gjykatës. Ato dispozita u gjetën jokushtetuese pasi vendosën kufizime të paligjshme në të drejtën e privatësisë.

Si shkelje të së drejtës së shëndetit, AI veçon rimbursimin e pamjaftueshëm për personat e infektuar me Covid-19.

Në gusht, Ministria e Shëndetësisë urdhëroi vaksinimin e detyrueshëm kundër Covid-19 për grupet me rrezik të lartë si personeli mjekësor, mësuesit dhe studentët. Sipas Avokatit të Popullit, numri i personave të infektuar me Covid-19 ishte shumë më i madh se paketat e trajtimit për të cilat ata mund të rimbursoheshin. Pacientët e diagnostikuar në periudhën mars-nëntor 2020, si dhe ata që rezultuan pozitivë nga institucionet shëndetësore private, nuk kishin të drejtë të rimbursoheshin për mjekimin.