Pandemia e babëzisë/ Si u "shtypën" nga të mëdhenjtë vendet e varfra

Që nga shpërthimi i emergjencës Covid, numri i vdekjeve të shkaktuara nga virusi ka qenë 4 herë më i lartë në vendet me të ardhura të mesme të ulëta sesa në vendet e pasura. Ky është konkluzioni i një analize të OXFAM, botuar në raportin “Pandemia e babëzisë”, të cilit i referohet Avvenire. Dy vjet pas nisjes së pandemisë, Oxfam, anëtare e Aleancës Popullore të Vaksinave me Emergjencën, thotë se virusi SARS-COV-2 ka ende ndikim të paqëndrueshëm, veçanërisht në vendet e varfra, ku 93% e njerëzve janë ende të pavaksinuar.

Duke marrë parasysh numrin e vdekjeve, krahasuar me periudhën para pandemisë, vlerësohet se në nivel global viktimat ishin 19.6 milionë, ose katër herë më shumë se shifrat zyrtare. Duke përdorur të njëjtën matje për çdo person që humbi jetën nga Covid-19 në një vend me të ardhura të larta, vdiqën 4 në vendet me të ardhura të ulëta ose të mesme të ulëta, me vetëm variantin Omicron, përgjegjës për rreth 3 milionë viktima që nga shfaqja e tij.

Vaksinat përfaqësonin shpresën e madhe, por qeveritë e vendeve me të ardhura të larta kanë sabotuar vazhdimisht çdo përpjekje për të parashikuar një shpërndarje globale, të shtyrë nga logjika nacionaliste. Megjithëse po hyjmë në një “epokë post-Covid”, ende mijëra njerëz po vdesin në vendet me të ardhura të ulëta nga mungesa e dozave. Niveli i imunizimit i arritur me dozën e tretë ose të katërt në vendet e pasura nuk është i mjaftueshëm, se sa më shumë që virusi të vazhdojë të qarkullojë lirshëm në pjesën e madhe të popullsisë së botës ende të pa vaksinuar, aq më i madh është rreziku i varianteve të reja. Derisa vendeve me të ardhura të ulëta dhe të mesme t'u mundësohet të prodhojnë vaksina në mënyrë të pavarur dhe në shkallë të gjerë, përmes ndarjes së patentave dhe teknologjisë, pandemia duket se do të mbetet me ne për një kohë të gjatë.