bota

SHBA mund të përballet me pasoja të tmerrshme në Lindjen e Mesme nëse vazhdon të mbështesë Izraelin, ka paralajmëruar ministri i Jashtëm Iranian, Hossein Amir-Abdollahian.

Komentet e tij vijnë pas sulmeve amerikane në objektet ushtarake në rajon, që dyshohet se përdoren nga forcat e Teheranit.

Abuzimi seksual në Kishën Katolike spanjolle ka për herë të parë një shifër. Një raport i hartuar nga Avokati i Popullit në kuadër të një komisioni hetimor ka konkluduar se viktima të abuzimit në mjedise që lidhen me Kishën janë gati gjysmë milioni spanjollë, që prej vitit 1940.

Raporti është bazuar mbi anketat. Sipas tij, 1.13% të të rriturve në Spanjë kanë pësuar abuzime seksuale në sferën fetare kur ishin të mitur dhe 0,6% drejtpërdrejt nga priftërinjtë dhe njerëz të tjerë të fesë.

Ukraina u kërkon demokracive perëndimore të rrisin investimet në armë. Në një intervistë për Politico, ministri i Ukrainës për Industritë Strategjike, Oleksandr Kamyshin, kërkoi që vendet perëndimore të përshpejtojnë prodhimin e raketave, predhave dhe dronëve ushtarakë sa më afër vijës së frontit.

Kryeministri hungarez, Viktor Orban, akuzoi Bashkimin Europian se po kërkon të arrijë të njëjtin dominim si Bashkimi Sovjetik dikur. Në përvjetorin e kryengritjes së Hungarisë, në vitin 1956, kundër BS, Orban tha se BE po tenton t’i heqë Budapestit identitetin.

Përfaqësuesit e Bashkimit Evropian e gjetën veten përpara akuzave për hipokrizi dhe standarde të dyfishta lidhur me qasjen e tyre ndaj Rusisë dhe Izraelit gjatë Samitit të Paqes të së shtunës në Kajro. Në takimin ku ishin të pranishëm përfaqësuesit e 30 vendeve dhe disa organizatave ndërkombëtare dhe rajonale, qëllimi ishte të diskutohej mbi mënyrat e zgjidhjes së konfliktit të vazhdueshëm izraelito-palestinez.

Ish-kancelari gjerman, Gerhard Schroeder, akuzon qeverinë amerikane si pengesë për arritjen e një marrëveshjeje paqeje mes Rusisë dhe Ukrainës. Në një intervistë të botuar në Berliner Zeitung, Schroeder i referohet negociatave të paqes në mars, menjëherë pasi Rusia ndërmori ndërhyrjen ushtarake në Ukrainë.

Parlamenti vendor i provincës Saskatchewan ka miratuar një projektligj, sipas të cilit, nxënësit nën 16 vjeç nuk mund të ndryshojnë referencën gjinore pa lejen e prindërve.

Fjala është për gjininë e përemrave.  Sipas ligjit të ri, nxënësit transgjinorë nuk mund të deklarojnë identitet tjetër gjinor nga ai natyral, pa marrë paraprakisht miratimin e prindërve.

Prodhuesit francezë të verës protestuan këtë javë kundër importit të verës spanjolle, me argumentin se po krijohet konkurrencë e pandershme në tregun vendas, i cili tashmë ka teprica.

Sipas Le Parisien, rreth 500 protestues u mblodhën në një autostradë pranë qytetit kufitar francez të Boulou, ku ndaluan disa kamionë me produkte spanjolle dhe shkatërruan ngarkesat e tyre.

“Shengeni nuk ka vdekur, por është prishur, prandaj ne duhet ta rregullojmë”, tha ministri i Brendshëm austriak, Gerhard Kerner, në Luksemburg, gjatë një takimi të përbashkët për shtyp me homologen e tij gjermane, Nancy Faeser.

Për përfaqësuesit e Vjenës dhe Berlinit, rivendosja e kontrolleve të kufijve të brendshëm është "e nevojshme" përballë "presionit" të "konsiderueshëm" migrator.

Gratë kërkojnë më shumë vend në Kishën Katolike. Një grup përfaqësuesesh të kësaj lëvizjeje janë mbledhur në Romë për të përcjellë kërkesën e tyre. Nga Europa, Shtetet e Bashkuara, Kolumbia, India apo Afrika e Jugut, ato thonë se i bashkon fakti se janë të përjashtuara nga rolet kryesore në atë që shumë e shohin si një Kishë "patriarkale dhe maço".