Kreu i ri i KQZ, Biba: Nuk kemi kohë për votim elektronik, këtu njerëzit dhe teknologjia janë të pabesueshëm

Që prej javës së kaluar Denar Biba ka marrë në dorë drejtimin e KQZ-së, ku për efekt të numrave mazhoranca nuk e pati të vështirë ta kalojë në parlament edhe pa konsensusin e opozitës.
Një kandidaturë thellësisht politike për të cilin opozita nuk kontestoi, ndoshta për të intimiduar procesin më vonë kur edhe llogaritë elektorale do të zbresin në tryezën e KQZ. Megjithatë Biba e pranon dhe vetë se problemi për zgjedhjet që do të vijnë mbetet kontrolli politik dhe angazhimi i militantëve. I pyetur nga Gazeta "Shekulli" për mundësinë e aplikimit të votimit dhe numërimit elektronik, si një mënyrë për të shmangur ndikimin politik, Biba ka dhënë këtë përgjigje.
"Jo vetëm unë, por çdo qytetar shqiptar mendoj se e ka kuptuar që faktori njerëzor është problemi kryesor i menaxhimit të zgjedhjeve në vend, dhe jo mungesa e teknologjisë. Thelbësisht të politizuar dhe pa asnjë përgjegjshmëri qytetare, kryekëput të bindur ndaj forcave politike apo më saktë kandidatëve përkatës që i kanë zgjedhur, këta dritëshkurtër e kanë mbushur kupën. Mua nuk më mbetet veçse të përsëris vetveten, pasi prej kohësh kam kërkuar zëvendësimin e anëtarëve militantë të KZAZ dhe KQV me qytetarë të depolitizuar, siç e ka edhe bota e qytetëruar".
Por edhe pse pranon rrezikun e ndikimit politik mbi procesin zgjedhor, kryetari i ri i KQZ reflekton të njëjtin qëndrim që ka mbajtur mazhoranca lidhur me propozimin për votimin dhe numërimin elektronik të votave. Sipas tij koha nuk premton dhe garancitë për zgjedhjet do jenë sërish politike.
"Teknologjia tek ne u pa si shpëtimtare, në mungesë të besimit reciprok më palëve pjesëmarrëse në zgjedhje, por nuk ka asnjë provë sot në botën e qytetëruar se besimi vjen nga teknologjia. Akoma më tej, zbatimi i proceseve si ato që ju përmendni në të gjithë vendin, kanë një kosto shumë të lartë dhe, mbi të gjitha, kërkojnë një familjaritet shumë më të madh nga ky që ka sot votuesi i zakonshëm shqiptar me teknologjinë. Këto nga ana tjetër kërkojnë kohë, kohë që, të paktën për zgjedhjet e 2017 nuk e kemi më".
Sa i takon shpejtësisë së nxjerrjes së rezultatit, kreu i KQZ propozon kthimin në një model administrimi të disa viteve më parë, ku votat numërohen në Qendrat e Votimit, model i adoptuar së fundmi edhe në Kosovë.
"Për shkak të gjeografisë sonë dhe rrugëve jo kudo të asfaltuara, vetëm transporti nga QV në ZAZ kërkon orë të tëra. Ndërkohë është bërë natë dhe njerëzit janë të lodhur pasi kanë qenë gjithë ditën në veprim. Numërimi nis, për t’u ndërprerë pas pak. E kështu për çdo zgjedhje. Shembulli i Kosovës, ku votat numërohen direkt në QV tërheq vëmendjen në mënyrë shumë pozitive. Zgjidhjet pra janë aty. Por duhet besim për t’i zbatuar"- thekson Biba për Shekullin.