Selami i zhgënjyer me demokracinë, por beson ende te brezi i vjetër

Duke mos dashur t' i japë merita personale askujt prej liderve të dhjetorit për ndryshimet demokratike të viteve '90 , Eduart Selami nuk fsheh zhgënjimin për 25 vitet e tranzicionit dhe produktin demokratike të kësaj periudhe.
"Askush nuk duhet të marrë merita personale për atë që ndodhi në vitet ’90, me protestat, revoltën dhe reagimin qytetar. Ishin qytetarët ata të cilët i dhanë goditjen sistemit në një kohë kur paralelisht po rrëzoheshin të gjitha regjimet komuniste. Siç tentojmë të marrim meritat për ato zhvillime, duhet edhe të ndajmë përgjegjësinë për faktin se edhe pasi kanë kaluar 25 vite, nuk mundëm të realizojmë atë që shumë nga ne besuan. Nuk arritëm të ndërtonim një vend me demokraci të zhvilluar”, tha Selami gjatë një aktiviteti për 25-vjetorin e lëvizje e demokratike.
Megjithatë Selami vazhdon të besojë se brezi i vjetër mund të japë akoma për demokracinë, duke i përcjellë kështu një mesazh edhe për kryetarin Basha dhe qëndrimin e tij për luftën e brendshme në Partinë Demokratike.
“Kam një lajm të keq për ata që janë të përqendruar te një ‘luftë’ brezash. Një lufte mes të rinjve dhe të vjetërve. Konrad Adenauer ishte 74 vjeç, kur u zgjodh për herë të parë si kancelar i Gjermaninë, në vitin 1949, dhe qëndroi aty për 14 vjet. Ndaj mosha nuk është asnjëherë avantazh apo disavantash brenda një force politike”, tha Selami.