Ndahet nga jeta ish-presidenti italian, Oscar Luigi Scalfaro

Ka vdekur gjatë natës, në moshën 93 vjeçare, Oscar Luigi Scalfaro, i cili ka qenë eksponent i rëndësishëm i Partisë Demokristiane Italiane, që ka dominuar jetën politike në Italinë e pasluftës. Pas rënies së Republikës së Parë, që pati për pasojë shkërrmoqjen e partisë komuniste dhe asaj demokristiane, Scalfaro kaloi me Partinë Demokratike, që në një masë të madhe është pasuesja e Partisë Komuniste (në fakt, kalimi në këtë parti ndodhi pas mbylljes së mandatit presidencial, në vitin 1999). Scalfaro ka qenë anëtar i parlamentit në të gjitha legjislaturat, qysh prej vitit 1946 deri në vitin 1992, kur u zgjodh President i Republikës. Më pas ka qenë senator ‘deri në fund të jetës’. Është nga paktët (tok me Sandro Pertini-n e Enrico de Nicola-n) që ka ushtruar përgjegjësitë më të rëndësishme në hierarkinë shtetërore italiane, atë të Presidentit të Republikës, të kreut të Senatit e të kreut të Dhomës së Deputetëve.

Shqiptarët duhet ta kenë fiksuar në kujtesë për faktin,që më 24 maj të vitit 1996, dy ditë para zgjedhjeve të bujshme (të bujshme, ngaqë votat u vodhën ‘me thasë’) të 26 majit, Scalfaro ka marrë pjesë në tubimin e mbylljes së fushatës së Partisë Demokratike dhe nga tribuna e atij tubimi u është drejtuar shqiptarëve me fjalët: “Ju e keni doktorin tuaj; ai është Sali Berisha”. Është një nga pak gjërat pa mend që ka bërë në këtë botë, e nuk është çudi të jetë penduar për këtë. Sidoqoftë, e vërteta është se më pas nuk i është kthyer kurrë atij momenti.

M.N.