Berisha zbrapset edhe një hap prapa në mbrojtje të Prendit & co.

Pasi prokuroria paraqiti dje në gjykatën e apelit prova të reja dhe dëshmi që tregojnë se arma që vrau Faik Myrtajn në 21 janar 2011 ishte në duart e Ndrea Prendit dhe jo të dikujt tjetri atë ditë, Berisha bëri edhe një hap prapa në mbrojtje të kryegardistit. Në mbledhje me deputetët e tij, ai tha se duhet parë nëse përdorimi i armës ishte në përputhje me rrethanat apo në tejkalim të nevojës për mbrojtjen e Kryeministrisë.  Pra, ai po sugjeron që vrasjet e 21 janarit të konsiderohen si vrasje pa dashje. Deputeti socialist Xhemal Qefalia anëtar i Komisionit të Sigurisë së Kuvendit, i tha dje gazetës Sot se alibia e vrasjeve pa dashje është një manovër e pashpresë e Berishës për të mbuluar implikimin në vrasje si dhe për të përballuar valën tjetër të arrestimeve. “Kjo alibi është një përpjekje e pashpresë për të përballuar edhe arrestimet e ardhshme. Nuk mund të konsiderohen vrasjet si pa dashje, kur Garda u drejtoi me urdhër armët protestuesve. Garda qëlloi drejt mbi protestuesit. Pa dashje mund të ishte nëse Prendit do t’i shpëtonte pistoleta nga brezi. Por ai ka qëlluar me vetëdije 11 herë mbi turmën”, theksoi Qefalia.

 Gazeta Sot njofton gjithashtu se ekspertiza e FBI ka treguar se gardistët kanë qëlluar në lartësi të vogël nga toka, duke rrezikuar kështu jetën e demonstruesve. Në grupin e gardistëve që akuzohen  bëjnë pjesë: kapiteni Agron Aliaj, komandanti i grupit, toger Spartak Zilja, n/oficer, Meleq Zaimi, Mark Nikolli, Sadik Çela dhe Gazmend Ahmetaj etj. Nuk dihet ende nëse këta persona kanë vrarë, apo plagosur ndonjërin nga protestuesit, por tashmë ka prova se ata kanë qëlluar mbi turmën.

Ndërkohë, gazeta MAPO ka zbardhur planin operacional të Gardës për 21 janarin, në të cilin shkruhet: “Në rast se situata është e dhunshme dhe krahas mjeteve të forta përdoren edhe armët e zjarrit nga persona apo grup personash, si dhe tentohet të hyhet me dhunë në ORV (objekt i rëndësisë së veçantë), të kryhen këto detyra: I gjithë personeli i shërbimit të qëndrojë në gatishmëri të plotë, i pozicionuar dhe të veprojë ME URDHËR në hapjen e zjarrit, të pengojë me mjete të tjera depërtimin e personave që hyjnë në ORV e të marrin masa për rivendosjen e situatës.”

Duke krahasuar planin operativ të gardës me atë që ekspertiza e FBI-së na tregon, rezulton se një grup gardistësh, me në krye Prendin,  kanë qëlluar në të njëjtën kohë drejt turmës dhe se hapja e zjarrit duhet të jetë bërë ME URDHËR.

E.Zaloshnja