Karburantet, skema që “vodhi” shtetin dhe qytetarët

Të zgjuar këta tregtarët e karburanteve, duan të nxjerrin fitime nga çdo situatë në treg. Përpos rritjes së çmimeve (e ndikuar nga ecuria e karburanteve në tregjet ndërkombëtare) dhe cilësisë së dobët në mjaft raste, përfitojnë duke bërë edhe disa marifete të tjera.

Çfarë ka ndodhur? U lajmërua që në korrik 2011 se duke filluar nga shtatori 2011 si edhe janari i këtij viti, mbi çmimin e karburanteve do të shtohej edhe një taksë e re e quajtur si “Taksa e qarkullimit mbi karburantet”. Taksa do të aplikohej me 5 lekë/litri për karburantet duke filluar nga 24 gushti dhe me 2 lekë/litri të tjera duke filluar nga 1 janari 2012.

Çfarë kanë bërë tregtarët? Duke ditur se taksa e re do të hynte në fuqi në janar, ata kanë importuar sasi të konsiderueshme karburantesh në muajin dhjetor 2011. Rritja e taksave do të bënte që të rritej edhe çmimi karburanteve, siç edhe ndodhi realisht. Në këtë mënyrë, ata do të shisnin me çmim të rritur karburantin (siç ndodhi) që kishin futur në dhjetor (të pataksuar me 2 lekë/litri) duke i hequr buxhetit të shtetit disa milionë lekë nga njëra anë, por duke u marrë padrejtësisht disa lekë më shumë qytetarëve. Skema zbardhet nga të dhënat statistikore të Drejtorisë së Përgjithshme të Doganave.

Në dhjetor 2011 u importuan plot 68 805 ton karburante, sasia e dytë më e madhe e futur krahasuar me muajt e tjerë të vitit dhe rreth 20 mijë ton më shumë se dhjetori i vitit 2010. E njëjta skemë përfitimi është ndjekur edhe në muajin korrik 2011, një muaj para hyrjes në fuqi të pjesës së parë të taksës mbi karburantet. Edhe gjatë korrikut pati rritje të ndjeshme të importit të karburanteve (73 553 ton).

S.E.