Eduard Selami me partinë e Bamir Topit?

Ka ca kohë që po spekullohet me idenë e rikthimit të ish-kryetarit të PD-së, Eduard Selami; veçse jo në “grupin politik ku do duhej të kontribuonin të gjithë” (fraza e futur në thonjëza është e Selamit, është e thënë një vit më parë, dhe fjalën e ka pasur për PD-në), por në partinë e re që pritet të krijohet, e që hë për hë, për kollajllëk, është pagëzuar si partia e Topit. E përditshmja Shqip i rikthehet këtij lajmi me një fakt të ri. Eduard Selami do të jetë në Tiranë pas dy javësh, dhe kjo vizitë ka lidhje me krijimin e kësaj partie. “Do të ketë një ceremoni themelimi”, pretendon Shqipi.

Vetë Selami nuk është shprehur lidhur me këtë ngjarje të pritshme. Dhe ata që mbajnë kontakte të vazhdueshme me të nuk dinë të thonë ndonjë gjë të saktë. Me sa duket, Selami nuk ka marrë asnjë vendim. Ai mund të vijë në Tiranë, por ka gjasa që vjen për të bërë një rikonjicion para se të marrë vendimin.  Si zor që ai të ketë pritur kaq gjatë për të marrë një vendim kaq lehtë.

Re.Pu.