Në Komitetin Shtetëror luhet teatër absurd

Një orë diskutime pati në Komitetin Shtetëror për Ndërtimin e Kompleksit të ri Parlamentar. Ishte si një mbledhje absurde, surreale, ku pjesëmarrësit flisnin si të ishin në trance. Ja një pjesë diskutimesh.

Jozefina Topalli: “Ky është një vendim i rëndësishëm për përzgjedhjen e monumentit të demokracisë”.

Sali Berisha: “ [Projekti austriak është 3 milionë euro më tepër se projekti tjetër, por juria ndërkombëtare na ka sugjeruar të zgjedhim projektin austriak; nuk na falet] mosrespektimi i verdiktit të korifejve të arkitekturës auropiane dhe botërore; i zgjodhëm duhet t’i respektojmë. Ky është dhe parimi; nuk është një shumë kaq domethënëse sa të na imponojë ne të përmbysim vendimin e tyre. Çmimi i zbatimit të projektit është i lartë, por anëtarët e jurisë të vendosin në mënyrë të pavarur”.

Jozefina sërish: “Dilema është mes së bukurës, të veçantës dhe unikes”.

Ridvan Bode: “Komiteti ndërministror është krijuar për garantimin e procedurave ligjore, dhe jo për të vendosur kush është projekti më i mirë apo më i keq. Në përgjithësi ne veprojmë me koston më të ulët, por nëse ky nuk është kriter, atëherë nuk ka përse të hyhet në vlerësimin e komisionit”.

Astrit Patozi: “Për sa kohë nuk shoh vajtimin e ministrit të financave, nuk ka përse të kursehet; [të miratojmë] projektin qe ka marrë vleresimin e parë nga juria!”

Lulzim Basha:"Bashkia e Tiranës nuk është pjesë e vendimarrjes, por japim mbështetjen tonë për veprën. E mbështesim sepse projekti është një vepër e madhe për Tiranën”.

Pas këtyre diskutimeve “brilante” juria votoi si fitues projektin e studios austriake. Gara quhet e mbyllur.

M.N.