Aleanca Kuqezi ironizon znj. Topalli si dikur MJAFT-i znj. Nano

Në një prononcim për mediat sot, Aleanca Kuqezi ka ironizuar znj. Topalli me stilin e ironive që përdorte dikur me sukses Lëvizja “MJAFT!” ndaj bashkëshortes së ish-kryeministrit Nano. Pas argumentëve seriozë rreth kostos së udhëtimeve të pafund të Topallit jashtë shtetit dhe akuzave për përfshirjen në to të familjarëve të saj, zëdhënësja e Aleancës Kuqezi lëshoi edhe këtë silurë:

 “Aleanca Kuqezi i kërkon spikeres së parlamentit që të lejojë ministrin e jashtëm të kryej detyrën e tij në përmbushje të misionit diplomatik i cili është mbivendosur nga aspirata e znj.Topalli për të qenë ministre e jashtme. Por sipas gjasave, spikerja e parlamentit aspiron edhe për postin e kreut të shtetit shqiptar. Aleanca Kuqezi i kujton zonjës Jozefina Topalli së një nga kushtet për tu zgjedhur President i Republikës është që minimalisht kandidatet duhet të kenë jetuar 10 vitet e fundit në territorin e Republikës së Shqipërisë. Zonja Topalli gjatë dy viteve të fundit ka qëndruar më shumë në ajër se në tokë”.

Aleanca Kuqezi pretendon se sondazhet e saj tregojnë që është partia e parë në qarqet kryesore të Shqipërisë. Në qoftë e tillë, duhet të sillet si e tillë…

E.Zaloshnja