Raporti sekret: Si funksionon “mafia” e kromit në Bulqizë

U desh denoncimi publik i Shemsi Prençit, ish-drejtorit të Policisë së Qarkut Dibër, në lidhje me aktivitetin mafioz që kryhej në minierat e Bulqizës për të rikthyer vëmendjen e medias në këtë drejtim. “Shekulli” hapet sot me një raport sekret të Sektorit Kundër Krimit Ekonomik në Polici, në të cilin zbardhet skema se si funksionon shfrytëzimi i paligjshëm i minierave, jashtë çdo standardi teknik duke sjellë çdo vit viktima nga aksidentet, por edhe nga lufta midis rivalëve jashtë galerive.

Skema është e njëjtë: Hallexhinjtë, përfshirë fëmijë dhe të moshuar, nxjerrin kromin në sipërfaqe nga minierat e zaptuara nga të fortët e zonës. Më pas këta, ia shesin mallin një kompanie të licencuar me një çmim më të ulët duke ligjëruar kështu aktivitetin dhe të ardhurat. Kompania e licencuar nga ana e saj e dërgon kromin e blerë në Durrës me qëllim eksportin.

Raporti zbardh edhe arsyet e disa vrasjeve në zonë, të cilat lidhen pikërisht me aktivitetin e paligjshëm në minierat e kromit. Për më tepër, vërehet që shteti është i pafuqishëm, pasi siç duket edhe nga raporti, Policia e Shtetit por edhe Prokuroria e Përgjithshme janë në dijeni të asaj çka po ndodh në Bulqizë por deri më tani nuk kanë ndërhyrë.

Ja disa pjesë nga raporti; Në galerinë nr.60, zona D, punojnë në mënyrë të jashtëligjshme një grup punëtorësh për llogari të shtetasve E.C dhe B.Ç. Minerali transportohet nga hyrja e galerisë për në shesh-grumbullimin e zonës D me kafshë ose karroca dore! Pasi e grumbullojnë materialin, këta persona e shesin atë me një çmim më të lirë tek një kompani e licencuar”

-Në këtë galeri punojnë në mënyrë të jashtëligjshme punëtorë për llogari të shtetasit L.T.....Zakonisht, punëtorët futën në galeri pasdite, pra jashtë orarit të punës.

-Në galerinë nr.48, nxjerrësit e kromit punojnë për llogari të shtetaseve D.Gj dhe I.J, të cilët janë persona të shpallur në kërkim për veprën penale të vrasjes se kryer në bashkëpunim!

Re.Pu.