Hashim Thaçi niset për në SHBA, ku e pret një agjendë ‘perandorake’

E përditshmja Zëri, duke u bazuar tek një informacion i dhënë nga “burimet ndërkombëtare të akredituara në Kosovë”, e ka dhënë qysh më 16 mars lajmin se Thaçi do takohet me Obama-n. Dhe me atë rast nënvizonte se “ishte Washingtoni që i dha mbështetje kryeministrit Thaçi për prezantimin e Kosovës me fusnotë”.

Një ditë përpara, më 15 mars ish Koha Ditore që jepte të njëjtin lajm që dilte nga i njëjti burim. Por Koha jep një detaj më tepër: “Takimi i është premtuar Thaçit nga zv.sekretari amerikan i Shtetit, William Burns, kur ky ish në Prishtinë gjatë shkurtit. Burns-i, gjithnjë sipas Kohës Ditore të asaj dite, e ka bindur Thaçin të pranojë fusnotën, që deri në këtë kohë refuzohej nga ky i fundit”.

Gazeta Express e disa ditëve më parë, teksa njoftonte mbi takimin e datës 6 prill midis Thaçit e Obama-s në Washington, thosh se “i dëgjuan me kujdes këshillat, e si shpërblim duket se po marrin vëmendjen e tyre, qoftë edhe për disa minuta”.

Shkurt, ky takim është ‘honorari’ që Thaçi ka marrë në këmbim të fusnotës. Kryeministri nuk e ka komentuar në asnjë rast deri më sot këtë udhëtim në SHBA, që tanimë është fakt i kryer; e ka filluar sot kët vizitë. Është tok me ministrat Enver Hoxhaj e Vlora Çitaku dhe, sipas agjencisë Noa që i referohen të gjithë, do të takojë një ‘qerre me njerëz’: Barack Obama-n, Joe Biden-in, Hillary Clinton-in, Ban Ki-Moon-in, dhe një numër kongresmenësh. Një agjendë kaq të ngjeshur e të rëndë takimesh në SHBA nuk e ka pasur asnjë shqiptar gjatë 100 viteve të fundit. Berisha çfarë s’do bënte për të patur 1/100 e kësaj agjende; fjala vjen për t’i dhënë pak dorën Philip Reeker-it që është një nga zëvendësat e njërit prej zëvendësave të Hillary Clinton-it.

Askush prej komentatorëve politikë kosovarë nuk i ka dhënë një shpjegim të plotë kësaj vizite. Vetëm me fusnotën të shpjegohet, vallë?

M.N.