Lufta në Ukrainë e bëri Europën Lindore, Europë

Në një opinion të shkruar për “Politico”, Andrew A. Michta i Qendrës Europiane Marshall, e cilëson luftën atuale në Ukrainë, si një luftë për të ardhmen e Europës. Sipas tij kjo përballje do të sjellë rikonfigurimin gjeostrategjik të kontinentit dhe të arkitekturës së tij të sigurisë. Michta thotë se keqllogaritjet e presidentit rus mund të sjellin ndryshime pozitive epokale, duke i dhënë fund një ndarjeje të definuar edhe në antropologjinë politike të Europës, mes Lindjes dhe Perëndimit.

NATO është në fund të fundit pushtet i forcës dhe i mbrojtjes kolektive dhe do të jetë ky pushtet që pas luftës do të udhëheqë përkufizimin e institucioneve dhe arkitekturës së re të një Europe të së ardhmes. Siç ndodhi në gjenezë të Luftës së Ftohtë, një qendër e re graviteti do të shfaqet në Europë – përherë e më tepër në verilindje…Sot Europa ndodhet në një pikë infleksioni sepse mbetet e mbërthyer nga “të menduarit institucional” që është shkëputur përherë e më shumë nga realitetet e pushtetit të forcës në terren. Marrëzia e Putin kundër Ukrainës ka vënë në lëvizje një proces që nuk mund të prapësohet.

Dhe jo vetëm pse qendra e gravitetit të Europës po zhvendoset drejt verilindjes, por edhe pse dikur koncepti i mjegullt i Europës Lindore si këneta e Perëndimit një imazh i përforcuar nga luftërat ballkanike të 1990-ë, është çmonuar i gjithi. Europa Lindore është tashmë e gjitha europiane, historia dhe trashëgima e saj e zbuluar rishtas në universitetet amerikane dhe qendrat studimore për çdo ditë, me imazhe nga Riga, Varshava dhe Kievi që popullojnë ekranet tona

shkruan autori.

Një optimizëm i theksuar ky që sugjeron se ndërhyrja ruse theu disa kufij që përndryshe mendohej se ishin aty përjetësisht. Edhe pse duhet thënë se shekulli i 20-të i lëvizi shumë kufijtë dhe në fakt e ripërkufizoi Europën Lindore si tribut të kundërmësymjes së një ideje perëndimore vënë në shërbim historik të gjeopolitikës së Rusisë si konkluzion.