Presidencialet në Francë: Edhe tri javë deri në ditën e votimit

Kandidatët presidencialë në Francë kanë dhe tri javë në dispozicion për të kandisur zgjedhësit që ta hedhin votën në favor të tyre. Përqindjet e Sarkozy-së e Hollande-it në raundin e parë parashikohet të jenë të afërta, por sondazhet i japin socialistit fitoren në raundin e dytë (në fakt, në të gjitha vendet e Eurozonës që kanë patur zgjedhje pas fillimit të krizës, fitorja ka shkuar për opozitën).

Ku dallojnë këta dy kandidatë në planin programor? Sipas së përjavshmes The Economist, Sarkozy-ja ka marrë një qëndrim shumë nacionalist, kërcënon me braktisjen e pasaportës Schengen, është ngritur kundër emigracionit, madje dhe kundër biznesit të dyqaneve Hallall. Ndërsa kandidati Hollande, si socialist që është (shumë socialist, madje), premton zgjerimin e gjësë publike, të administratës, të shtetit, është zotuar të krijojë 60 mijë vende të reja pune për mësuesit, të ulë moshën e pensionit (që u ngrit nga Sarkozy-ja), t’i shtrydhë mirë pasanikët (për të cilët ka thënë para ca kohësh se i urren), dhe për këtë do ta ngrejë deri në 75% taksën mbi të ardhurat e tyre.

Kandidatja e tretë, Marine Le Pen do të jetë e fortë në raundin e parë, sidomos tani pas ngjarjes në Tuluzë, por nuk ka gjasa që të arrijë në raundin e dytë.

Re.Pu.