Rezultatet e zgjedhjeve kanë nevojë të lexohen

Të përditshmet Shekulli e Panorama, me publikimin e rezultateve të zgjedhjeve të 8 majit, i kanë paraprirë KQZ-së, që pritet të bëjë sot shpalljen zyrtare. Por nuk ka ndonjë news në këtë mes, pasi këto të dhëna egzistojnë prej kohësh në duart e partive e të medias. Mund të bëhet një résumé, megjithatë; ose mund të nënvizohet kjo résumé për të gjithë ata që e kanë bërë. Aleanca opozitare për të Ardhmen ka marrë 671 612 vota, ose 42,75% të të gjithë votave. Aleanca qeverisëse për Qytetarin ka marrë 813 335 vota, dmth rreth 140 mijë vota më tepër, ose 51,77% të të gjitha votave. Afërmendsh, këto shifra flasin për një fitore të qartë të maxhorancës.

Por Partia Socialiste në opozitë mund të mburret me rezultatin e vet. Ajo ka marrë 432 823 vota; Partia Demokratike 330 950; diferenca është në favor të PS-së me mbi 100 mijë vota. Kjo tregon se Berisha i ka fituar këto zgjedhje në sajë të një alkimie elektorale (ai ka mbledhur ç’i ka dalë përpara), por në korpusin elektoral të maxhorancës bien në sy LSI-ja (117707 vota), dhe PDIU-ja (63 426 vota), që ish një risi elektorale e papritur.

Një lexim më kompleks e më dinamik na mëson tri gjëra të rëndësishme: së pari, vota lokale është e ndryshme nga vota politike, së dyti ka një trend urban në favor të opozitës, gjë që u verifikua me fitoren e socialistëve në pothuaj të gjithë qytetet kryesore (ku kufiri mes votës lokale dhe asaj politike është më vështirë të dallohet), dhe së treti mbetet shumë e rëndësishme mbledhja e çdo vote.

E.G.