Rama: Azem Hajdari xhonglonte me teza nacionaliste për të bërë për vete turmat e dëshpëruara

Në shkrimin e Ramës mbi të djathtën, Berishën, Topin, Spahiun (që çuditërisht ish publikuar veç në Tema e në Panorama, që janë larg njëra-tjetrës në shumë drejtime; të tjerat nuk e botonin; e shumta, e jepnin si lajm), kish një pasazh lidhur me Azem Hajdarin. Për këtë të fundit është folur pak, ndonëse ka qenë një personazh shumë i rëndësishëm në dekadën e parë pas rrëzimit të komunizmit. Është folur nga të vetët, por rëndom është folur me superlativa, pa iu futur thellë personazhit.

Edhe Rama nuk është se thotë ndonjë të madhe. Flet shkarazi për të. Gjen rast të flasë për Hajdarin, teksa thotë të vetën lidhur me Spahiun e Aleancës Kuqezi. “Kreshnik Spahiu ka lidhje me Partinë Socialiste po aq sa ç’ka pasur miku i tij i ngushtë Azem Hajdari, me të cilin kryetari i kuqezinjve ngjiti shkallët e militancës politike në gjirin e PD-së dhe të cilit i ngjan shumë sot në retorikën nacionaliste”, thotë ai fillimisht duke na zbuluar kështu një detaj nga jeta e ish-zv.kryetarit të KLD-së. Pakkush e ka ditur që mentori i Spahiut ka qenë Hajdari.

Dhe Rama vijon të kërkojë ngjashmëri të tjera mes të dyve: “Njësoj si Azemi ai xhonglon mjeshtërisht me turmat e të dëshpëruarve dhe nuk harron asnjëherë të thotë se mbron edhe interesat e ish-komunistëve të ndershëm paçka se qoftë përkatësia e tij politike, qoftë e gjithë shfaqja kuqezi që u ofron shqiptarëve janë produkt i ideologjisë të së djathtës shqiptare të thuajse 100 vjetëve më parë.”

E.G.