868 të papunë të rinj në tre muaj?! Po “bujqit”?

Shqipëria e mbylli tre mujorin e fundit të vitit të shkuar me 868 të papunës të rinj. Kjo është shifra që deklaron INSTAT në publikimin e fundit të tij mbi papunësinë në vend. Sipas të dhënave, treguesi i papunësisë arriti në 13.29 për qind të tre mujorin e fundit të vitit 2011 nga 13.25 për qind që ishte përgjatë periudhës korrik-shtator 2011.

Instituti ndërkohë konfirmon se në periudhën tetor-dhjetor 2011 u punësuan 2 522 persona, por përsëri kjo ecuri pozitive në dukje, nuk ka mundur të përballojë rritjen më të madhe të numrit të personave që janë të aftë për punë. Numri i tyre u rrit me 3 390 duke bërë kështu që 868 veta të mbeten pa punë.

INSTAT i ndan të punësuarit në tre kategori; të punësuar në shtet; të punësuar në sektorin privat jobujqësor dhe të punësuar në sektorin privat bujqësor. Këta të fundit përbëjnë rreth 54 për qind të totalit të të punësuarve në vend. Në listat e të punësuarve në sektorin privat bujqësor përfshihen të gjithë ata që kanë në pronësi tokë bujqësore. Presupozohet që ata punojnë tokën dhe marrin të ardhura prej saj. Fakt është që në të gjithë vendin gjenden hapësira të mëdha toke bujqësore që nuk kultivohet duke treguar kështu se numri real i të papunëve është më i madh nga sa deklarohet zyrtarisht.

S.E