Kundërsulm i Spahiut ndaj komisionit të Berishës. Por mbrojtja ndaj akuzave të komisionit mungon…

Kreu i Aleancës Kuq e Zi, Kreshnik Spahiu, gjatë një konference për shtyp sot, u ka bërë thirrje deputetëve të Kuvendit që të kërkojnë një interpelancë me kryeministrin Sali Berisha, për takimin që ka zhvilluar me kreun e Demokracisë së Re greke, Antoni Samaras. Ai kërkon që të zbardhet takimi mes kryeminstrit e Samaras, i datës 12 dhjetor 2011, gjatë Kongresit të Partisë Popullore Evropiane. Samaras i propozoi asokohe Berishës që dy vendet të shqyrtojnë përsëri marrëveshjen për përcakimin e kufijve të zonave detare dhe të shelfit kontinental mes Shqipërisë e Greqisë. Për këtë arsye, Spahiu ka kërkuar nga kryeministri Berisha që të zbardhë pazarin me Samaras për kufirin detar dhe çfarë do të përfitojë ai nga kjo marrëveshje. Ai theksoi më tej se kompani të njerëzve të mafias serbe janë kualifikuar nga qeveria shqiptare në koncesione kërkimi nafte në jug dhe jugperëndim të vendit.

Ky sulm frontal ndaj Berishës vjen pasi një komision parlamentar (i kontrolluar krejtësisht nga Berisha) hetoi veprimtarinë e Spahiut si Nën-Kryetar i KLD-së dhe paraqiti një raport, ku ky i fundit akuzohet se ka përdorur fondet e institucionit për udhëtime që kanë patur të bëjnë me aktivitetet e Aleancës Kuqezi dhe jo me KLD-në. Në Shqipëri është bërë zakon që politikanët t’u përgjijen akuzave me kundërakuza. Do të ishte e udhës që Spahiu, si udhëheqësi i një lëvizje që po shënjestron “sulltanët” e politikës shqiptare, të mos përdorë taktikat e tyre të dala boje. Vetëm pasi të sqaronte publikun sesi qëndron e vërteta për përdorimin e fondeve të institucionit që ka administruar, ai mund të hidhej në kundërsulm ndaj Berishës. I cili ndoshta meriton sulme edhe më të forta se të Spahiut…

Re.Pu.