Investimet e huaja, zbardhet shkaku i “dalldisë” së Berishës për shtetësinë

Ajo që na u duk “dalldisje” e Kryeministrit Berisha disa javë më parë, tek deklaronte se do t’i jepte shtetësinë shqiptare të gjithë atyre që investonin më shumë se 100 mijë euro në vend, nuk paska qenë e tillë apo thjeshtë tentativë për të devijuar vëmendjen e publikut nga ndonjë temë dite. Nisma qënkesh bazuar në treguesit e investimeve të huaja direkt në Shqipëri, të cilat gjatë tre mujorit të tretë të vitit të shkuar paraqiten në nivele minimale.

Investimet e huaja po pësojnë ulje nga muaji në muaj në Shqipëri. Publikimi më i fundit i Bankës së Shqipëri tregon për një ulje me 32.8 për qind të tyre gjatë tre mujorit të tretë të vitit të shkuar krahasuar me vitin 2010. Më konkretisht, raportohet se gjatë periudhës korrik-shtator 2011, të huajt kanë investuar 166.4 mln euro (rreth 222 mln dollarë) në vendin tonë. Të gjitha investimet e huaja të kryera nga janari deri në shtator 2011 ndërkohë, vlerësohen si 25.6 për qind më të ulta krahasuar me nëntë mujorin e vitit 2010.

Referuar këtyre shifrave, del në pah se Shqipëria po përballet me ulje drastike të këtyre investimeve duke marrë parasysh faktin se gjatë 2010-s në vend u futën jo pak por 1.1 miliardë dollarë nëpërmjet investimeve të huaja.

Mësohet se 65.9 e investimeve të huaja direkte përfaqësohen nga vendet e BE-së. Greqia dhe Italia janë vendet me përqindjen më të lartë të investimeve në stokun total. Duke marrë parasysh edhe krizën që po përjetojnë këto vende mund të kuptojmë edhe ecurinë negative të investimeve të huaja në Shqipëri.

S.E.