Vetvendosja vijon të jetë e pranishme në sheshe; këtë herë kundër Fusnotës

Sipas ndonjë gazete (shih Koha Ditore online), në protestën e sotme të Vetvendosjes kundër marrëveshjes mbi pjesëmarrjen “jo sovrane” të Kosovës në takime e veprimtari rajonale, kanë marrë pjesë disa mijra vetë. Ndërsa sipas qeverisë, kanë qenë disa qindra vetë.

Por përtej numrave, protesta është zhvilluar sipas programit. “Nuk duam të pushtojmë institucionet”, tha Albin Kurti. “Thjesht duam që për tri a katër orë t’i izolojmë, e të ndalojmë hyrje-daljet në to”. Ia kanë arritur qëllimit, ndonëse protesta është monitoruar nga më shumë se dy mijë policë e ndonëse zërat nga qeveria thanë se “e kanë pasur mendjen tek puna, e cila ka vijuar normalisht”. Sloganet që u hodhën, apo  që lexoheshin, ishin “Me Hajna nuk ka shtet”, “Kush e jep Republikën? Hashim Thaçi; Kush e mbron Republikën? Populli”, “Poshtë Thaçizmi”, “Republikën Kosovës, Borkon Editës”, etj.

Albin Kurti garantoi se “do të ndodhë pranvera kosovare”, dhe me këtë ka bërë një paralele me Pranverën arabe.

Re.Pu.