Portieri Buffon provokon një debat mbi etikën në futboll

Pas ndeshjes Milan-Juve të serisë A në Itali ka sjellë debat një gol i anuluar në dëm të Milanit. Ish një top i goditur me krye nga Muntari, që ish ngjitur me portën, dhe që portieri Buffon e kapi gjysmë metri përtej vijës fatale. Vijëruajtësi nuk pati mundësi ta shihte, pasi çdo gjë u zhvillua në harkun e një fraksioni të sekondës. Sikur të mos mjaftonte ky fakt, portieri Buffon bëri një deklaratë të fortë pas ndeshjes: “Në moment nuk pashë që topi të kish hyrë brenda portës, por edhe sikur ta kisha parë nuk do t’i thoja arbitrit”. Shumë vetë janë zhgënjyer nga çfarë tha Buffon-i që, sipas tyre, “nuk duhej t’i thosh ato fjalë aspak edukative qoftë si kapiten i nacionales italiane, qoftë si model për mijra e mijra fëmijë e të rinj”.

Pas këtij debati të ndezur, Buffon nuk u mendua dy herë për ta rinënvizuar frazën e vet: “Do ta rithoja atë që thashë. Po të thoja të kundërtën, do gënjeja. Pastaj, çfarë kërkojnë? Kërkojnë që edhe arbitrin ta bëjmë ne?”

Gjëja mbetet e diskutueshme, megjithatë. Dhe me siguri do të vijojë të diskutohet.

Re.Pu.