Kamishi nuk na e zbuloi gjë a gjëzën e vet lidhur me Albinin pro-serb

“E para, pse [Albini] është takuar me serbët në Klinë në vitin 2004? Të tregojë se kush janë ata serbë, me të cilët është takuar, a janë serbë të Kosovës apo të Serbisë dhe pse ka qenë i mbuluar me batanije kur është takuar me ata? E dyta ka të bëjë me gruan serbe, me të cilën është takuar vazhdimisht në Pogradec, si dhe është parë edhe në Prishtinë. E treta, duhet të tregojë se çka përmban letra, të cilën e ka marrë me 28 shtator të 2011-ës nga vajza e ministrit të Millosheviçit.”

Sa më sipër i ka deklaruar nja dhjetë ditë më parë deputeti i PDK-së, Bekim Haxhiu, i thirrur ndryshe Kamishi (ne si website kemi informuar lidhur me këtë). Dhe po në atë rast, Kamishi bëri me dije se do të presë deri më 8 shkurt, që Albini të përgjigjet. Më pas, do të nxjerrë dëshmitë e dëshmitarët.

Gazetarët pritën dje, por më kot. Bekim Haxhiu ka dalë sot në një konferencë për shtypin, por kërshëria e gazetarëve sërish nuk është përmbushur. “Faktet ia kam dorëzuar kryetarit të Komisionit për Mbikqyrje të Agjencisë së Kosovës për Inteligjencë, Florin Krasniqi dhe se është në dorën e këtij të fundit që t’i bëjë publike”, u shpreh Kamishi.

Dihej që ky do ishte fundi i asaj gjë a gjëze.

E.G.