Vinca: Sejfulla Malëshova nuk është anti-geg

Në një shkrim të tijin të publikuar në gazetën Shqip, shkrimtari Agim Vinca rrëfen mbi një kurth televiziv, ku e ka futur një ish-studentja e tij, sot gazetare e moderatore e një programi. Kjo e fundit e fton në studio dhe e vendos përballë një farmacisti, me të cilin do duhej të diskutonte mbi gjuhën e mediave në përgjithësi, e të atyre elektronike në veçanti. Në debat e sipër, farmacisti denoncon si antigeg Sejfulla Malëshovën, alias Lame Kodrën, i cili sipas tij ka luajtur rol në ekskludimin e gegërishtes e favorizimin e toskërishtes në përpjekjet e projektet për të ndërtuar standartin e shqipes. Dhe në këtë pikë, Vinca e lë mënjanë farmacistin e studios telelvizive, dhe merret me një “farmacist” tjetër. E ka me Mehmet Elezin,” ish-sekretarin e rinisë komuniste, shumë i dashur prej Enverit”, i cili në librin e tij ‘Gjuha shqipe në bunker’ ka shkruar, se “siç tregojnë dokumentet, më agresivi kundër çdo vlere të gegërishtes ishte Sejfulla Malëshova”.

Ndonëse në këtë libër flitet për dëshmi dokumentare që e komprometojnë Sejfulla Malëshovën si antigeg, Elezi nuk jep asnjë dëshmi të tillë. Sipas Vincës, dokumenta të tillë nuk egzistojnë, pasi Malëshova në të vërtetë nuk ka qenë antigeg. Nuk mund të jetë antigeg një njeri që pëlqen gegun par excellence, Gjergj Fishtën, thotë në thelb Agim Vinca. Dhe po këtu na bën me dije, se S. Malëshova e ka konsideruar Fishtën, tok me Konicën e Nolin, si “fytyrat më të mbëdha të Shqipërisë në fushën e kulturës”. Shkrimin e Agim Vincës mund ta gjeni në:

http://www.gazeta-shqip.com/#/opinion/ea27ef61136280a3b7c0ce68452dcd69.html

E.G.