Ministri turk në Kosovë: ndryshoni tekstet e historisë

Ministri turk i Arsimit, Omer Dinçer kërkon ndryshimin e teksteve shkollore të historisë në Republikën e Kosovës. Këto “amendime” minsitri turk i ka kërkuar për raste “ku përdoren fjalë fyese për shtetin dhe popullin e Turqisë”. Kërkesa është bërë gjatë takimit me Ministrin e Arsimit të Kosovës, Ramë Buja, i cili është shprehur se janë duke punuar në këtë drejtim. Ai e informoi kolegun turk se është formuar një komision i veçantë i cili ka vizituar edhe Turqinë dhe është duke verifikuar faktet historike që lidhin Kosovën me Turqinë. Sipas Radio Televizionit të Kosovës (RTK) librat e rinj “të reformuar” të historisë së Kosovës do të jenë të gatshëm për vitin e ardhshëm shkollor. Të dy ministrat kanë rënë gjithashtu dakord për themelimin e një Universiteti turk në Kosovë.Gjatë vizitës së tij në Prizren ministri turk është falur edhe në xhaminë e Sinan pashës të restauruar me ndihmën e shtetit turk. Nuk është hera e parë që turqit artikulojnë kërkesa të tilla për rishikim të historisë. Shtypi i Tiranës ka shkruar disa herë për “kamuflimin” e portreteve a pikturave që përshkruanin momente të betejave ku turqit ishin “inferiorë” ndaj shqiptarëve, apo portreteve të luftëtarëve shqiptarë të periudhës osmane.

L.A.