Kryeprokurorja përgënjeshtron RD-në dhe i tregon dhëmbët Berishës

Pritet një riaktizivim i fortë i Prokurorisë bazuar në raportin e FBI-së mbi 21 janarin, dhe kjo pritmëri nuk duket se është pa gjë. Është vetë sjellja e maxhorancës që të bën ta besosh këtë version. Berisha vetë ka dhënë një seri intervistash në të gjitha studiot e mundshme, dhe është fokusuar ekskluzivisht tek 21 janari, tek puçi, tek puçistët, tek organizatorët e protestës, etj. Intervistat e tij kanë qenë nervoze. I njëjti nervozizëm vihet re sot edhe në gazetën e Partisë Demokratike, ku sulmohet Ina Rama. Në këtë gazetë flitet për një letër që Prifti i ka dërguar Ina Ramës, e cila provon lidhjen Prifti-Rama-Rama-Topi; RD-ja bën aluzion, gjithashtu, se Dritan Prifti ka paguar kryeprokuroren me miliona.

Ina Rama nuk e ka bërë të udhës të reagojë në rrethana të tilla, por këtë herë “nuk ka përtuar”. Fillimisht saktëson: “Në një nga mediat e shkruara, është botuar një shkrim, në datën 21.01.2012, mbi një letër që deputeti Dritan Prifti i drejton Prokurorit të Përgjithshëm, Znj. Ina Rama. Prokuroria e Përgjithshme bën me dije se deputeti Dritan Prifti i ka dërguar [me të vërtetë] një letër Prokurorit të Përgjithshëm, porse përmbajtja e saj është tërësisht e ndryshme nga ajo çfarë thuhet në këtë gazetë. Kjo letër është trajtuar zyrtarisht, dhe është e protokolluar.”

Më poshtë, kryeprokurorja “nxjerr dhëmbët”: “Me këtë rast, Prokuroria e Përgjithshme shprehet se është e vendosur të kryejë detyrën e saj kushtetuese pavarësisht insinuatave të ndryshme që synojnë të devijojnë angazhimin e prokurorëve dhe punonjësve të Prokurorisë në hetimin e çështjeve që janë dhe në fokus të vëmendjes së opinionit publik”.

S’e kemi parë ndonjëherë kryeprokuroren kaq ‘hazërxhevap’.

Re.Pu.