Aleanca Kuqezi duket se do të shndërrohet në parti politike më shpejt se sa pritej

Një tryezë e përbashkët me ekspertë të huaj dhe shqiptarë në lidhje me reformën zgjedhore, e mbledhur sot nga Aleanca Kuqezi në Tirana International Hotel, duket si një hap tjetër i saj drejt shndërrimit në parti politike. Në këtë tryezë, përfaqësuesit e Aleancës Kuq e Zi theksuan domosdoshmërinë e korrigjimit kombëtar të sistemit aktual zgjedhor, garantimin e së drejtës së votës për emigrantët dhe numërimin elektronik të votave. Nuk ka asgjë të re në këto kërkesa të Aleancës Kuqezi – partitë e vogla ka disa muaj që po i kërkojnë  këto gjëra – por e reja qëndron në faktin se kërkesat vijnë nga një lëvizje që ende nuk është futur në garën politike. Sipas një interviste të Kreshnik Spahiut dhënë para disa javëve ve, Kuvendi i Aleancës Kuqezi do të mbahet në Maj dhe u la të kuptohej se atëherë do të bëhet edhe regjistrimi i saj si parti politike. Por fillimi i procedurës për shkarkimin e Spahiut në parlament mund t’i ketë përshpejtuar këto plane.

Synimi i Aleancës Kuqezi për ndryshimin e sistemit zgjedhor është i kuptueshëm, por në tryezën e organizuar prej saj nuk u bë e qartë se ç’do të bëjë ajo për ta arritur këtë synim, kur Berisha nuk është fare i interesuar për ndryshimin (shihini shkrimin “Përse Berisha nuk e do korigjimin kombëtar të sistemit zgjedhor rajonal” http://www.respublica.al/opinion/2012/1/9/perse-berisha-nuk-e-do-korigjimin-kombetar-te-sistemit-zgjedhor-rajonal ) Nga eksperienca e Aleancës Kuqezi me ligjin për Censusin, dimë se ajo organizoi një peticion për ndryshimin e tij, i cili kërkonte 20 mijë firma. Në rastin e ndryshimit të kodit zgjedhor nga jashtë parlamentit, do të duhet një referendum me 50 mijë firma.

E.Zaloshnja