‘21 janari amerikan’ në zhgjëndrrat e mija

Hap televizorin, dhe kanali NBC ka si "breaking news" një skandal që ka plasur në administratën amerikane. Zëvendës Presidenti, Zoti Biden, është duke i kerkuar disa favore Sekretarit të thesarit zotit Timothy Geithner. Në videon prej 10 minutash duket qartë ku Zoti Biden me një bllok të zi në dorë i drejtohet zotit Geithner për disa favore që ai duhet t’i bënte atij. Një skandal i vërtet,  kanalet flasin pa pushim për këtë skandal, dhe populli amerikan vetëm pret reagimin e Presidentit Obama. Gazetarët janë mbledhur në sallën e konferencës së shtypit ku Presidenti Obama do të dalë të sqarojë popullin amerikan për këtë çështje. Pas disa minuta ankthi në pritje, Presidenti Obama ecën drejt podiumit, ai përshëndet të pranishmit dhe fillon të sqarojë skandalin tashmë të njohur. Për çudi Presidenti Obama akuzon NBC –në si një televizion që ka manipuluar dhe e ka shpikur këtë skandal, madje “çakenjte” e NBC kanë arritur të vendosin edhe fjalë të pa thëna në gojën e zotit Biden. Gazetarët janë të shtangur, ashtu siç jam edhe unë, nuk më besohet ajo që po ndodh, si ka mundesi, unë e pash vet i them vetes, si të jetë e mundur, mos ndoshta ndonjë manipulim i teknologjisë hollivudiane.
 Populli Amerikan është shumë i revoltuar nga kjo ngjarje, por më shumë është i revoltuar nga mospërfillja e administratës dhe moskokëcarja e Presidentit Obama dhe zëvendësit të tij. Disa ditë me vonë vendoset të bëhet një protestë e madhe e disa organizatave jo-qeveritare,  por edhe vetë popullit që kundërshton këtë mospërfillje. Njerëzit marshojnë në Pennsilvania Avenue me thirrje kundër administratës, dhe me pankarta në duar i drejtohen gardhit të Shtëpise së Bardhë, pa pritur shumë krisma dëgjohen dhe një kaos i vërtet fillon të ndodhë, televizione të ndryshme e ndjekin live këtë ngjarje dhe nëpërmjet ekranit ne shikojmë njerëz të shtrirë në tokë. Policia që u hedh ujë njerëzve, që i godet, i rreh i qëllon. Ç’po ndodh them me vete, si ka mundësi në vëndin më demokratik njerëzit të rrihen dhe vriten barbarisht "live" dhe shumë vetë e ndjekin këtë ngjarje  nëpërmjet televizionit. Nuk më besohej, ditët që vinë bëhet bilanci, 4 të vdekur, shumë të plagosur. Tani, thashë me vete, çdo gjë ka marr fund për administratën Obama, e kaloi cakun e moralit të një qeverie.
Nuk kalon shumë dhe Presidenti Obama del në një tjëter konferencë për shtyp dhe akuzon kongresin amerikan dhe Partinë Republikane për Grusht shteti, bile partia e tij në pushtet fillon të hapë një investigim të ngjarjeve që sapo ndodhën, madje në këtë akuzë janë të pëfshirë edhe gazetarë të NBC-së dhe gazetës New York Times. Sipas administratës të gjithë ata marshues ishin të pajisur me stilolaps pistolet dhe çadra pushkë, për një moment e besova, pasi CIA është një institucion që edhe mund t’i disponojë këto lloj armatimesh, por diçka nuk shkonte në këto mendime, kaq larg të shkonte konspiracioni?
Skandali vazhdon të rrahë të gjithë ekranet e televizioneve, por Presidenti Obama nuk e çan shumë kokën nga ky presion; zoti Biden jep dorëheqjen duke i hapur kështu drejtësisë dhe kryeprokurorit të pergjithshem Zotit Eric Holder derën për të hetuar këtë skandal. Kalon shumë kohë, shumë dëshmitarë janë thirrur edhe më në fund prokuroria kërkon burg për të akuzuarin Biden. Çështja vete në gjykatën federale dhe me padurim pres vendimin që do japë kjo gjykatë. Televizionet vazhdojnë japin pamje nga takimi i fundit i Presidenti Obama me zotin Biden 2 ditë përpara dhënies së verdiktit përfundimtar.
 Çasti erdhi, edhe unë pres përpara ekranit me shpresën se më në fund do të bëhet drejtësi, se si mund të jetë ndryshe, nuk mund të na kenë lën sytë të tërëve, nuk mund të na kenë lën veshët të gjithëve.Gjykata vendos: Zoti Biden i pafajshëm.

Nuk ka mundësi them me vete, këta gjykatës nuk kanë kuptuar anglisht, këta gjykatës nuk kanë dëgjuar atë që dëgjoi i gjithë pupulli, duke patur këto pyetje e mendime shqetësuese dëgjoi një zë që buçet me të madhe, zgjohem, nga televizori vjen zeri i kryeministrit tone, i cili mburr Shqipërinë si vëndi me ekonominë më të zhvilluar në Evropë dhe që shumë shpejt do ja kalojë edhe Gjermanisë, dhe se qeveria duhet të angazhohet më shumë në mbjelljen e arrave dhe dixhitalizimin e bujqësisë, isha duke fjetur,  e gjithë ajo histori që po shikoja ishte thjësht një ëndërr e keqe, nga ato që të kap pas një dite të lodhur pune, shyqyr thash që ishte një ëndërr, e si mund të ishte tjetër, të gjitha ato fantazi me konspiracione, lojra luftash, e televizone spiune. E si mund të vrasë një qeveri perëndimore dhe demokratike popullin e vet vetëm e vetëm se protestoi dhe goditi me gurë? E si mund të ndodhë që një gjykatë të bëj veshin shurdhër dhe syrin qorr përpara provave të pa mohueshme. E pra ajo nuk mund të ndodhë të paktën në djepin e demokracisë, në dritën e shpresës se njerëzit janë të lirë të shprehen, të kundërshtojnë, të bëjnë opozitë, kjo nuk mund të ndodhë kurrë në atë që e përmend edhe himni i tyre  "The land of the Free", toka e njerëzve të lirë, ajo kurrë nuk mund të ndodhë në Amerikë. Me këto mendime në kokë marrë telekomandën në dorë, mbyll televizorin dhe i drejtohem krevatit me shpresën për të parë ëndëra të bukura.