Studentët kundër Ministrisë së Arsimit

Dje, rreth orës 14:00, qindra studentë të fakulteteve të ndryshme kanë protestuar në mjediset e Fakultetit të Shkencave Sociale kundër vendimeve dhe projekteve të Ministrisë të Arsimit dhe Shkencës lidhur me stazhin për profesionet e rregulluara, detyrimin ligjor për të certifikuar gjuhën angleze përmes një testi të njohur ndërkombëtarisht dhe reformën e re financiare të institucioneve të arsimit të lartë.

Studentët e grumbulluar fillimisht pranë Fakultetit të Shkencave Sociale, marshuan drejt Rektoratit me pankarta në duar, duke bërë thirrje për shpëtimin e dimensionit publik dhe emancipues të universitetit.  Sipas tyre stazhi, i cili nuk paguhet, cenon parimin shtet-formues e kushtetues të punës së paguar. Barra financiare që krijohet nga papunësia, e kamufluar në formë pune të papaguar, rëndohet edhe më sepse, sipas reformës të re financiare, pritet qe tarifat shkollore vjetore për student të ngrihen. Paratë publike do të financojnë universitetet private të vendit (që po dalin si kërpudha pas shiut e pas diellit), çka rrjedhimisht do të thotë ulje e financimit për universitetin publik. “Diplomat nuk janë mall”, shkruhej në njërën nga pankartat e studentëve, të cilët thonë se shteti, në vend që të nxisë programe mësimore publike, inkurajon “çertifikatosjen” dhe vë në diskutim diplomat që vetë i lëshon. Ndërsa marshonin drejt Rektoratit studentët thërrisnin njëzëri: “Shtet njih Vetveten”, “Ndal rrënimit të Publikes”, “Puna paguhet” etj..

Marshimi ka vazhduar drejt Universitetit Politeknik, Fakultetit të Gjuhëve të Huaja dhe atij Ekonomik, ndërsa është paralajmëruar përshkallëzimi i protestave dhe bojkoteve.

Për ata që duan t’i bashkohen lëvizjes, në rrjetin social facebook është hapur grupi  “UNIVERSITETI NË RREZIK”(http://www.facebook.com/groups/fakultetishkencavesociale/).

J.M.