Ilir Meta në Opinion: në një lokal u gatua ‘pretenca’ kundër meje nga lideri i opozitës

Dalja e Ilir Metës dje në Opinion të jepte përshtypjen sikur donte të thoshte “unë flas ato që dua, ju shkoni ankohuni në Prokurori po s’u pëlqyen”.

Nga njëra anë Meta bëri thirrje për moral të ri në politikë, kur tha “nëse ju jeni dakord me këtë lloj morali në politikën shqiptare dhe çdo lloj morali që unë të vij në shtëpi e të përgjoj, të vij në zyrë e të përgjoj, që përgjojmë njëri-tjetrin dhe bëjmë shantazhe atëherë të jeni të sigurtë se moralin e kësaj shoqërie e kemi shumëzuar me zero.” Nga ana tjetër, ai ngrit një teori të re konspirative kur tha që “Natën e krishtlindjeve, mesa di unë, Prokurorja e Përgjithshme i festoi krishtlindjet në të njëjtin ambient me një lider shumë të rëndësishëm të opozitës, mos të them më të rëndësishmin. Por nuk mund të them se atje u gatua pretenca ndaj meje...” Pra, videoja me zë e figurë është e montuar, ndërsa dy njerëz që kanë qenë në një lokal japin garanci për komplot të përbashkët politik.

Biseda arriti maja sinqeriteti e naiviteti bashkë, kur, në lidhje me darkën me Kryeministrin, Meta u habit se si “si mund të bëhej presion ndaj gjyqësorit duke pirë verë?”

I pyetur për një video tjetër ku është e regjistruar edhe gruaja e tij Monika Kryemadhi ai tha se “u kam thënë dhe po ju them se çdo qytetar që ka materiale, letra, video, audio e çdo gjë tjetër komprometuese për mua apo për bashkëshorten time t’i çojë në prokurori (...) Të jeni të sigurtë se gruan time nëse ka shkelur ligjin nuk do ta hedh nga ballkoni e as ti them vdeksh, të përgjigjet para ligjet e të shkojë në burg nëse ka shkelur ligjin”.

K. Cukali