Rama: Për 100 vjetorin, në çdo zyrë fotografia e Ismail Qemalit

Partia Socialiste ka propozuar gjatë ditës së kaluar që me rastin e 100-vjetorit të shtetit shqiptar të jetë fotografia e Ismail Qemalit ajo që të përfaqësojë shtetin në çdo zyrë të administratës shqiptare. Propozimi është bërë nga kreu i PS, Edi Rama, në mbledhjen e grupit parlamentar. Edi Rama u shpreh se kjo forcë politike do të ketë planin e saj për kremtimin e 100-vjetorit të pavarësisë.

“Si fillim do i propozoja qysh sot qeverisë që ta ndryshojë VKM-në që përcakton se fotografia e Presidentit të Republikës duhet të vendoset në çdo zyrë të lartë të shtetit dhe të administratës shtetërore, për t’i dhënë fund banalizimit të skajshëm që është bërë me këtë normë, të respektuar sipas qejfit apo sipas konjukturave politike, me fotografinë e Presidentit të radhës. Dhe për të vendosur njëherë e mirë dhe përgjithmonë, në vend të portretit të radhës, portretin e themeluesit të shtetit shqiptar, Ismail Qemalit”, - propozoi Rama.

Liderët shqiptarë, e në veçanti Kryeministri, por dhe më gjerë politika shqiptare, kanë problemin e madh të respektit ndaj pozitave e institucioneve. Propozimi i Ramës ka sens, duke pasur parasysh që e vetmja figurë e lartë e politikës mbarë-shqiptare që nuk është atakuar e fyer publikisht (për momentin) është vetëm një që nuk jeton prej dekadash.

k.c.