Java, revista që u përpi qysh në numrin e parë. Do ta vijojë këtë sukses?

Revista Java, e cila pati numrin e parë të saj në fundjavën e fundit, rezultoi të jetë një risi mediatike. Ajo u zhduk nga kioskat e shitjes në harkun e disa orëve. E blenë pra sa hap e mbyll sytë, aq sa ‘shpikësit’ e saj, Skënder Minxhozi, Lorenc Vangjeli, etj, të cilët kanë pas shpine përvojën e suksesshme me Mapon, duhet të jenë bërë pishman që nuk kanë futur në proces botimi një tirazh më të madh. Kjo është mënyra më e mirë për të startuar me një titull të ri periodiku në treg.

Një ditë përpara se revista të dilte në treg, drejtuesit e bërësit e saj as që e kanë menduar se ideja për të intervistuar në numrin e parë ambasadorin danez, i cili ka marrë përsipër këto kohë të përfaqësojë i vetëm në Shqipëri ndërgjegjen kritike të diplomasisë ndërkombëtare ndaj regjimit të Tiranës, do të ishte një ide e shkëlqyer marketingu. Kanë qenë fatlumë, pasi edhe i intervistuari ‘ka qenë në formë’ e ka thënë gjëra, që kanë përbërë lajm. Dhe në fakt, qysh atë ditë, e më pas, të përditshmet e Tiranës dhe disa televizione i kanë bërë jehonë kësaj interviste. Tok me të, dhe revistës Java, emri i së cilës zuri të na bëhet familjar shumë shpejt.

M.N.