Sheshi, Prokuroria le të nisë hetimet, karvani do të shkojë përpara

Prokuroria e Tiranës ka nisur hetimet për ndryshimin e projektit të sheshit “Skënderbej”. Ky është një lajm i mirë, por njëkohësisht lajm pa ndonjë vlerë reale. Prokuroria ka nisur shumë hetime, por rrallë janë bitisur.

Denoncimi vjen nga nga disa këshilltarë bashkiakë të opozitës për  Lulzim Bashën, që sapo mori drejtimin e Bashkisë së Tiranës, nisi ndryshimin e projektit të sheshit të kryeqytetit, ndonëse në të po zbatohej një projekt. Këshilltarët opozitarë në Bashki përmes Aldrin Dalipit, kanë kërkuar nga prokuroria e kryeqytetit që të ndiqen penalisht abuzuesit pasi, sipas tyre, duke filluar nga faza e projektimit dhe në vijim të zbatimit të punimeve të fazës së parë të projektit, janë investuar rreth 5 milionë euro. Burime nga Prokuroria e Tiranës, bëjnë të ditur se prej pak ditësh kanë nisur në drejtim të Bashkisë së kryeqytetit një kërkesë, në të cilën kërkohen informacione mbi projektin e sheshit “Skënderbej”. Njësia e task-forcës ka kërkuar që administrata t’iu vendosë në dispozicion dokumentacionin përkatës për ndryshimin e projektit. Për të vlerësuar nëse ka një dëm financiar apo jo, raporton Shekulli.

Ky nuk do të ishte rasti i parë që abuzohet me projekte shtetërore, meqë janë paratë ‘e askujt’. Ideja e prishjes së Piramidës, kur në të janë hedhur për rikonstruktim 5 milionë euro, është një shembull. Por çështja me Prokurorinë nuk është se çfarë po fillon të hetohet, por ajo që realisht do të hetohet e më pas realisht do të gjykohet. Lulzim Basha e ka tashmë përvojën e duhur për t’iu shmangur gjykatave, për procedurë.

K.C.