Kush do të zgjidhet President i Republikës?

Në mbledhjen e sotme të qeverisë, Berisha deklaroi: “Ky është viti i zgjedhjes se Presidentit të Republikës. Garantoj se do të zgjidhet në përputhje me Kushtetutën. Çdo përpjekje për të imponuar dëshira suplementare në raport me Kushtetutën do të pësojë dështimet që kanë pësuar të tjerët. Të bëjmë përpjekje për t’i dhënë vendit një president në lartësinë e detyrave, Kushtetutës dhe ligjeve të vendit, e me integritet të plotë.”  Nga këto fjalë, duket qartë që Berisha e përjashton mundësinë e zgjedhjes së një presidenti konsensual, siç kanë sugjeruar publikisht ambasadorët kryesorë në Tiranë. Për kandidaturën e Fatos Nanos, ai ka lënë të kuptohet se nuk do të propozohet nga mazhoranca. Pra ka pak gjasa të jetë realisht në garë. Kështu që i bie të kandidojë ose një kukull të bindur të tij ose… vetveten.

Siç kam përmendur në shkrimin “Një mandat i tretë kryeministror për Berishën?” (http://www.respublica.al/opinion/2011/12/30/nje-mandat-i-trete-kryeministror-per-berishen), tullumbacen e parë për një kandidaturë presidenciale të Berishës e lëshoi i ndjeri Sabri Godo – para se të vdiste, ai i sugjeroi publikisht Berishës që të bëhej President i Republikës. Një gjysmë tullumbace e lëshoi më pas Henri Çili në një artikull në gazetën MAPO (Pse e do më tej pushtetin Sali Berisha?), në të cilin ai, praktikisht, i sugjeron Berishës që të mos kandidojë për një mandat të tretë kryeministror. Ky artikull u shkrua pasi Berisha pati atë “sëkëlldinë” shëndetësore në festën e 21-vjetorit të PD-së...

Le të presim e të shohim nëse, me fjalët “një president në lartësinë e detyrave, Kushtetutës dhe ligjeve të vendit, e me integritet të plotë”, Berisha ka patur parasysh veten e tij…

E.Zaloshnja