Trashëgimi mjekrrash e nofullash

Një vajzë 11 vjeçare amerikane, e quajtur Grejs Bedell, i shkruante Abraham Linkolnit përpara se ai të zgjidhej President i Shteteve të Bashkuaratë Amerikës:

“I nderuar Zoti Abraham Linkoln,

Babai im sapo u kthye në shtëpi dhe na solli fotografinë tuaj. Unë jam 11 vjeç dhe kam dëshirë që Ju të zgjidheni President i Shteteve të Bashkuara të Amerikës. A keni ndonjë vajzë që është në moshën time? Po qe se keni jepini asaj dashurinë time dhe i thoni të më shkruajë, nëse ju keni mundësi të më ktheni përgjigje.

Unë kam katër vëllezër dhe disa prej tyre do të votojnë për ju për president, por nëqoftëse ju e rrisni mjekrën unë do t’i bind edhe të tjerët që të votojnë për ju. Me mjekër fotografia juaj e varur në mur do të duket shumë më e bukur.

Zonjave u pëlqen mjekra, kështu që po qe se ju e rrisni mjekrën ato do t’u mbushin mendjen burrave të tyre të votojnë për ju.“

…Një pjesë nga letra e 16 vjeçarit, Gentjan Kërçiku. për zotin Sali Berisha, Kryeministër në detyrë i Shqipërisë:

“… Ishit idhulli im me plot gojën. Ju ishit arsyeja sepse e ndiqja aq fuqishëm politikën, sepse admiroja karrierën tuaj, admiroja karakterin tënd, personalitetin tënd por edhe natyrën e humorit që ju karakterizon. E mendoja që një ditë do të isha edhe unë atje në gjirin e PD-së në krahun tuaj. Unë vlerësoj jashtë mase shumë punën që ju keni bërë si Kryeminister i këtij vendi, sepse ju e keni bërë të prekshme këtë punë të palodhur tuajën.
Unë e pranova rezultatin e këtyre zgjedhjeve, ashtu si edhe ju, por atë që nuk mundem ta pranoj është dorëheqja nga Kryetar i PD-së. Jam ende i mërzitur nga ky vendim i juaji, sepse unë në të vërtëtë nuk i konceptoj dot mbledhjet e KM-së pa ju, nuk e konceptoj dot Parlamentin pa praninë tënde, pa humorin tuaj.
Tani nuk e di më nëse dua të vazhdoj të merrem me politikë sepse pa praninë tënde politika më duket e varfër. Por një gjë dua të të them se ju zoti SALI BeRISHA keni qenë, jeni edhe do të jeni kryeministri i Shqipërisë si dhe lider i PD-së.... Tani JU JENI LIDeRI MË HISTORIK I SHQIPËRISË. Ju uroj Shëndet në radhë të parë juve dhe Zonjës suaj. Ju uroj gjithë të mirat juve dhe Familjes tënde."

Letra e parë është shkruar me 15 Tetor 1860, letra e dytë është shkruar në fund të Qershorit, 2013; e para është shkruar kur Abraham Linkolni përgatitej të bëhej President i Shteteve të Bashkuara të Amerikës, e dyta është shkruar kur Sali Berisha, përgatitej të linte postin e Kryeministrit të Shqipërisë pas qëndrimit për tetë vjet në këtë detyrë.

Letrat i thonë të gjitha, edhe përgjigjet po ashtu.