LDK-ja lëshon bombën: Qosja ka marrë 220 mijë Euro për t’na sharë për hesap të PDK-së

Dje publikuam një lajm mbi qëndrimin e fortë të Rexhep Qosjes kundër Akademisë së Shkencave e të Arteve të Kosovës, ku ai “pickonte” fort dhe Isa Mustafën si një person që është “graduar” si akademik me logjikë, e për kontribute, politike. Sot ka reaguar ca më fort Lidhja Demokratike e Kosovës, e cila fillimisht denoncon një përpjekje të PDK-së së Thaçit “për të ndryshuar Ligjin për Akademinë e Shkencave dhe të Arteve të Kosovës”, gjë që për të është “e dëmshme, e papranueshme dhe e frymëzuar nga një logjikë staliniste”.

Por më poshtë, gjuha shkon ku dhemb dhëmbi. Është hera e një akuze të rëndë: “PDK-ja, pasi pagoi Rexhep Qosjen, e obligoi këtë të fundit që të dalë e ta përkrahë tendencën e mbrapshtë të PDK-së dhe në të njëjtën kohë ta shajë LDK-në, lidhur me një çështje me të cilën LDK-ja nuk ka të bëjë. Por, Qosja arsyet i ka të forta, meqë 220 mijë euro për disa të shara nuk janë pak”, nënvizohet në komunikatën e Kryesisë së LDK-së, e cila ka target deri në fund Rexhep Qosjen.

“Rexhep Qosja ... nuk ka kaluar kurrë procedura zgjedhjeje. Njeriu i dërguar në Akademi nga ish-Komiteti Krahinor i LKJ-së, nuk ka si i mëson të tjerët për rregulla demokratike të zgjedhjes. Po ashtu, i njëjti nuk e di nga i bie ASHAK-ja, meqë aty nuk ka shkelur me dekada, edhe pse vijon të marrë rrogë nga ASHAK-ja, pra nga taksat e qytetarëve të Kosovës”, vijon komunikata e LDK-së në përgjigje të j'accuse-ës së Qosjes një ditë më parë.

Dhe në fund deklarata i referohet frazës së famshme të Qosjes për një “revolucion të vonuar demokratik”, me të cilën ai ka përkufizuar atë që ndodhi në Shqipëri në vitin 1997, dhe me këtë rast atij i atribuohet një ambicje a dëshirë për të provokuar një “revolucion të ngjashëm” edhe në Kosovë. “Do të shkojë nga kjo botë i dëshpëruar, sepse një gjë të tillë nuk do ta lejojnë qytetarët e Kosovës”, garanton deklarata, pa e bërë shumë të qartë këtë lidhje mes Shqipërisë së ’97-ës dhe Kosovës së sotme.

Lihet gjithashtu pa sqaruar se ç’janë efektivisht ato 220 mijë Euro, që e kanë bërë Qosjen të flasë kundër LDK-së (sipas pretendimit të kësaj të fundit).

Re.Pu.