“Panorama” dhe “Shekulli”, 30 lekë nga nesër

Lexuesit e të përditshmëve “Panorama” dhe “Shekulli” kanë lexuar sot që në mëngjes njoftimin e redaksive përkatëse se nga nesër, ato nuk do të shiten më me çmimin 20 lekë, por me 30 lekë. Të dyja gazetat kanë vendosur t’ia kumtojnë lexuesve të tyre nëpërmjet redaksionaleve duke shpjeguar edhe arsyet e një hapi të tillë: kostoja në rritja dhe ruajtja e cilësisë.

Thano i “Shekullit” e nis shpjegimin e arsyeve me “sulmin që i është bërë bizneseve të mbështetësit financiar të kësaj gazete nga pushteti”, ndërsa shton më pas edhe rënien e reklamave nisur nga shkaqe të njëjta: presionit të ekzekutivit mbi reklamuesit. Por nuk harron edhe krizën, e cila ka shkurtuar buxhetin e reklamave për bizneset.

“Panorama” shpjegon se vendosi të rrisë çmimin për shkak të kostove të rritura duke synuar ruajtjen e cilësisë së shtypit për lexuesit: “Mbyllja e një zyre në Durrës apo Gjirokastër, shkurtimi i gazetarëve në Tiranë, apo heqja e një suplementi apo shkurtimi i faqeve do të thoshte të ofronim një produkt shumë më pak cilësor për të njëjtin çmim”. Dhe me këtë duan të thonë se kanë bërë zgjedhjen e kundërt, dmth ruajtjen e cilësisë dhe rritjen e çmimit.

Re.Pu