Arben Malaj i bashkohet zërave përkrahës të një aleance PS-LSI

Pas takimit tashmë të famshëm Rama-Meta, disa zëra autoritarë në PS janë shprehur pro një aleance të mundshme PS-LSI, në qoftë se kjo e fundit largohet nga koalicioni qeverisës. Këtyre zërave iu bashkua sot edhe Arben Malaj në një intervistë dhënë gazetës Mapo.

Ja ç’thotë Malaj për një aleancë të mundshme PS-LSI:

“Ka deklarata që tregojnë një përafrim qëndrimesh, por ende nuk ka një test konkret të qëndrimeve dhe bashkëpunimeve politike midis PS dhe LSI. Duhet përmirësuar përgjegjësia e krijimit të aleancave dhe koalicioneve qeverisëse, aq më tepër kur janë të spektreve të ndryshme politike. Në Britaninë e Madhe, kur liberaldemokratët u bashkuan me konservatorët në qeverinë e kryeministrit Cameron, ata i ruajtën disa elemente qartësisht të dallueshëm të programit të tyre politik nga programi i konservatorëve. Konservatorët nuk e kushtëzuan koalicionin qeverisës me eliminimin e këtyre dallimeve, por qartësuan fleksibilitetin e tyre si mazhorancë, duke pranuar se liberaldemokratët kishin të drejtë të synonin arritjen e votave të nevojshme për të miratuar reformat e tyre në Parlament. Nëse ky parim ka vepruar edhe në koalicionin PD-LSI, mund që LSI të synojë aleanca parlamentare me PS-në për reforma ose prioritete që i konsideron të rëndësishme. Pra, LSI mund të bashkojë vota me PS për reforma të ndryshme, duke filluar nga reforma parlamentare, reforma elektorale, mund të bashkojë vota për Presidentin e ri, duke ‘lehtësuar’ një koalicion të ardhshëm qeverisës me PS-në”.

Re.Pu.