Ben Blushi ‘bekon’ riafrimin PS-LSI

Pritej qëndrimi i Blushit lidhur me riafrimin mes Ramës e Metës (në terma politikë, mes PS-së e LSI-së), por me sa duket ky riafrim nuk është bërë pa ok-in e tij. Por edhe nëse nuk i është marrë ok-i, ai e jep ok-in aposteriori. Mbrëmë, ndërsa Rama ka qenë në TV Klan për të folur për këtë çështje, Blushi ka qenë në UTV për ta mbrojtur e justifikuar si sjellje politike.

Në këto rrethana politike “nuk kam asnjë dilemë [lidhur me aleancën me Ilir Metën]”, tha ai, dhe më poshtë shpjegon këtë pozicion të vetin pro kësaj aleance: “Nëse ka njerëz që janë të papërgatitur për këtë që po ndodh, kjo tregon se kanë problem me fantazinë e tyre, nuk parashikojnë dot që një ditë ajo që u duket e pamundur, mund të jetë e mundur dhe në qoftë se ka një gjë që stonon në këta 20 vjet në Shqipëri, është aleanca e PD-së me LSI-në. Aleanca PS-LSI, pavarësisht nga çfarë ka ndodhur, mënyra si është folur, për ta prishur apo për ta ndrequr këtë marrëdhënie organike, kjo aleancë është biologjikisht e mundur. Nuk hyj tek ata që janë shumë entuziastë, as euforikë për këtë që po ndodh, por hyj tek ata që mendonin se kjo gjë mund të ndodhte një ditë. Me sa duket, tani është koha.”

Blushi nuk e sheh të mbyllur e të kopsitur këtë punë. E sheh si një proces që sapo ka filluar.

Re.Pu.