I ungji i Aleks Nikës: E dënojmë aleancën e Ramës me Metës

E përditshmja Panorama i ka marrë një intervistë avokatit Mark Nika, të ungjit të Aleks Nikës që mbeti i vrarë në bulevard më 21 janar 2011 nga plumbat e Gardës së Republikës. Intervista vërtitet rreth një teme, riafrimit të Ramës me Metën, gjë që duket nga dy takimet që kanë bërë së fundmi (njëri publik e tjetri privat). Mark Nika nuk e sheh me sy të mirë këtë riafrim. “Një aleancë të tillë ne e dënojmë dhe e denoncojmë”, thotë ai në fillim të bisedës me gazetaren Elisabeta Ilnica. Dhe pak më poshtë tregohet më i qartë: “Tragjedia e 21 janarit e ka të gjithë zanafillën tek Meta. Indirekt i ka shkaktuar ai katër vrasjet. Protestat në shesh nisën me motivin kundër korrupsionit, ku Meta shfaqej në një video.... më 20 janar ishte Meta që doli në televizion dhe deklaroi publikisht, sepse sipas disa informacioneve të sigurta, protestuesit më 21 janar do të ishin të armatosur dhe do të qëllonin mbi forcat e rendit.”

Megjithatë, kur vjen puna tek një qëndrim ndaj Edi Ramës, i intervistuari i ul tonet: “Pavarësisht takimeve të tij, ne nuk ia kthejmë kurrizin Ramës. E kemi mik shtëpie dhe kemi qarë bashkë me të mbi trupin e Aleksit.” Por aty për aty, i trysur nga ideja që një mbyllje e tillë e bisedës mund të keqkuptohej, ai i kthehet sërish mesazhit të parë: “[Vetëm se kemi bindjen që] t’ia japësh dorën Metës, siç veproi Rama, do të thotë të bëhesh pis, [do të thotë] të ndotësh duart me gjak”.

Re.Pu.