SPAK nuk (duhet të)merret me motivet e Ahmetajt, por provat dhe dëshminë e tij

Arben Ahmetaj është i poshtër. Pse Arben Ahmetaj foli? Si e inskenoi intervistën me gazetarët e RAI 3? 

Këto janë disa “pyetje” mbi daljen e fundit të ish-zv.kryeministrit në mediat italiane, prej nga ku u hodhën akuza sipas të cilave në zyrën e kryeministrit Edi Rama ai ka parë mafiozë të hyjnë e të dalin.

Çfarë ndodh në këtë rast që e bën gazetarinë shqiptare një ndër fëlliqësitë më të mëdha të kësaj shoqërie? Ndodh që duke u marrë me motivet e dikujt që po bën këtë që po bën, ajo po shndërrohet në një lloj mediumi politiko-moral, një lloj byroje e hapur që në thelb po kriminalizon motivet e një njeriu, për të amnistuar akuzat e tij ndaj një tjetri. Pra ndaj kryeministrit.

Ka shumë kohë që kjo gazetari përparon pandalur në Shqipëri. Gazetaria e “analizës” së raportit të forcave mes palëve, duke evidentuar se çfarë fiton njëri apo tjetri, pa bërë kurrë një distancim nga politika të caktuara. Përherë në garë, në rolin e pakërkuar të profetit dhe moralistit. Shumëkush e kupton se përpjekja e tanishme me Ahmetajn shkon vetëm në favor të lehtësimit të pozitës llogaridhënëse të kryeministrit, që nuk ka sesi të mbrohet më, veçse të njoftojë suksesin e tij për kultivimin vjetor të frutikulturës qeverisëse, të cilën e kanë livadhisur njerëz si Ahmetaj.

Mirëpo nëse në kontekst të kësaj që po ndodh, do të konsiderojmë Akuzën Penale të Ahmetajt, është e qartë se për SPAK, nuk hyjnë ose nuk duhet të hyjnë në vështrim motivet e ish-zv.kryeminstrit, por provat që ai ofron si dëshmitar. Edhe pse ende jo si i Penduar. Dhe provat janë ato që vënë në lëvizje një proces penal ku patjetër duhet të thirret edhe pala e akuzuar. Në fund të fundit, ne nuk jetojmë në Diktaturë, ku e vërteta publike duhet të marrë konfirmimin e kryeministrit që të quhet e provuar. E vërteta publike është lakuriqe, atë thjesht duhet ta administrojnë edhe ato institucione që janë krijuar për këtë qëllim.

s.zaimi