Berisha për herë të tretë në “Tiranë-Elbasan”; hapet në maj

Kryeministri Berisha vizitoi sot në rrugën Tiranë-Elbasan për një tjetër inagurim. Në fakt nuk ka mbaruar tuneli, as rruga. Berisha shkoi të inagurojë nisjen e punës për ndërtimin e trasesë së rrugës. Ndoshta edhe nga afërsia gjeografike, Berisha ka bërë në fakt tre inagurime në këtë rrugë. Herën e parë shkoi për të inaguruar fillimin e punimeve në tunel (prill 2011), herën e dytë shkoi kur tuneli kishte arritur në gjysmën e punimeve (nëntor 2011), kurse herën e tretë sot, ka shkuar për inagurimin e fillimit të punimeve në trasenë e rrugës.

Kreu i qeverisë premtoi se qarkullimi në këtë rrugë do të fillojë në maj të vitit të ardhshëm. Siç mund edhe të paramendohet, një tjetër vizitë e tij pritet të bëhet edhe kësaj radhe për të inaguruar hapjen e qarkullimit, aq më tepër kur kemi të bëjmë edhe me një kohë që përkon me fillimin e fushatës elektorale. Megjithatë, deri në maj 2013 mbetet edhe një vit kohënë mes, ndërsa pritet që në një periudhë të afërt të dalë dritë në tunel nga ana e Elbasanit, sipas standardit të deritanishëm, e meriton edhe një vizitë tjetër para hapjes së qarkullimit...

S.E.