Vetëgjyqësia, mjeti i fundit i të dënuarve politikë nga regjimi komunist

Në fillimet e Partisë Demokratike, të dënuarit politikë nga regjimi komunist dhe të persekutuarit prej tij, në përgjithësi, nuk shiheshin me sy të mirë nga Berisha. Por kur ai kuptoi se kjo shtresë sociale prodhonte një sasi të konsiderueshme votash të qëndrueshme, filloi t’i afronte njerëzit e kësaj shtrese. Në kryesinë e PD-së u futën njerëz që kishin kaluar vite në burgjet dhe internimet komuniste. Do të kalonin disa vjet dhe të dënuarit politikë nga regjimi komunist dhe të persekutuarit prej tij do të futeshin në grevë urie për dëmshpërblimet dhe rehabilitimin që u kishte premtuar Berisha, por që nuk ishte materializuar. Dhe Berisha i nxorri nga greva e urisë me shkopat e gomës së forcave speciale të tij (në vitin 1994). Që atëhere, marrëdhënia mes Berishës dhe të dënuarve politikë nga regjimi komunist ka qenë gjithnjë e acaruar, por pa arritur në divorc të plotë. Aktet e fundit të vetëgjyqësisë së Gjergj Ndrecës, i dënuari politik nga regjimi komunist që u bë i famshëm për sulmet mbi disa zyrtarë të lartë të PD-së, janë një tregues se pika e divorcit të plotë mes Berishës dhe kësaj shtrese po afron.

Panorama raporton se, pas deklarimeve të Ndrecës se të enjten do godasë një ministër, ai është shoqëruar në komisariat, ku është marrë në pyetje. Siç raporton Panorama, në komisariat ai ka deklaruar se politikanët tani e tutje duhet të kenë kujdes. “Asnjë pyetje nuk më është bërë në lidhje me incidentet e mëparshme dhe nuk është e vërtetë që jam shoqëruar për detyrim paraqitje, sipas vendimit të gjykatës. Orari që më ka vënë gjykata është e vërtetë që është çdo të hënë, por në orën 12:00. Ndërsa në komisariat më kanë telefonuar në orën 6:00 të mëngjesit, aq sa m'u trembën edhe fëmijët. Kur u futa në komisariat më vunë përpara gazetën Panorama dhe nisën të më bëjnë pyetje rreth intervistës. U thashë disa herë që u përmbahem deklarimeve të mia, por u kërkova që të shënojnë edhe diçka tjetër: deri tani i kemi ofenduar politikanët, u kemi dhënë ndonjë grusht. Por tani e tutje të kenë kujdes pasi do t’i vrasim. Do të marrin plumbin në ballë dhe funeralet do të kenë punë për 140 ditë,” ka thënë Ndreca.

E.Zaloshnja