Taksa “marksiste” e socialistit Rama dhe e kapitalistit Buffet

Në mbledhjen e sotme të qeverisë, Berisha ka akuzuar liderin e PS-së për taksën progresive. “Ky sulmi që bën shoku Rama  me taksën marksiste tek fidelët e tij është i tëri i motivuar nga ndjenja personale, inate personale dhe atavizma të klithmës së të parëve, sepse statistika fakton se në vendin tonë 40% e vendeve të punës janë të krijuara nga 1% e bizneseve dhe [ai thotë] hajde t’u biem me topin marksist këtyre, që të shkatërrojme me qindra vende pune, ”- tha Berisha.

Rreth 9 mijë kilometra më në perëndim, në seancën e sotme të Senatit amerikan, pritet të prezantohet një projektligj që do të zbatojë për 1% të amerikanëve më të pasur një taksë të propozuar nga Warren Buffet, kapitalisti më i madh sot në SHBA. Buffet-i ka llogaritur se taksa mbi të ardhurat që ai ka paguar në vitin 2010 ka qenë më e ulët në përqindje se ajo që ka paguar sekretarja e vet. Kjo nuk është e drejtë, sipas kapitalistit të famshëm amerikan. “1-përqindëshi i amerikanëve me të ardhurat më të larta duhet të pagojnë një taksë më të lartë se ata që kanë të ardhura më të ulta,”- ka deklaruar ai. Prandaj ai ka sugjeruar që personat me të ardhura mbi 1 milion dollarë në vit të mos pagojnë një taksë më të ulët se 30% të të ardhurave të tyre vjetore.

Mirë taksën progresive të Ramës, që e quan “marksiste”, Berisha mund ta shpiegojë me inate personale dhe atavizma të klithmës së të parëve, po taksën “marksiste” të super-kapitalistit Buffet si do ta shpiegonte dot ky kryeministri ynë?

E.Zaloshnja