Të poshtëruar!

Më shumë se me zbatimin e ligjeve apo ruajtjes së sovranitetit territorial, arrestimi i dy anëtarëve të Policisë së Kosovës është një mesazh i fortë që qeveria serbe jep ndaj asaj kosovare por edhe faktorit ndërkombëtar, se në çdo rast, është ajo që hedh hapin e para.

Gazeta “Zëri” njofton (lajm i konfirmuar edhe nga shtetarët e Kosovës) se policët kosovarë nuk janë arrestuar brenda territorit serb, por në atë kosovar. Në këto kushte, një veprim tillë quhet “pengmarrje”.

Faktin se arrestimi apo pengmarrja e policëve është bërë thjeshtë për të poshtëruar Kosovën e konfirmon edhe një konferencë e posaçme për shtyp e ministrit të Brendshëm serb, Ivica Daçiç, i cili publikoi edhe fotot e “aksionit”.

Për ironi të fatit, një veprim tillë vjen pikërisht në kohën kur qeveria e Kosovës kishte marrë përsipër që të ishte ajo organizatorja e zgjedhjeve serbe në territorin e saj!!!

Tirana zyrtare ndërkohë është mjaftuar me dënimin e aktit dhe një kërkesë formale ndaj qeverisë serbe për lirimin e policëve. Edhe një herë, një guxim i tillë i Serbisë tregon se me apo pa përkrahjen e ndërkombëtarëve, është Serbia ajo që lëviz gurët e para duke luajtur me faktin e kryer, ndërsa qeveritë e Kosovës dhe Shqipërisë duhet të marrin “miratimin” para se të shprehen, pasi kanë frikë se u hiqet cilësimi “faktor stabiliteti në rajon”.

S.E.