Pa energji për shkak të defekteve, pavarësisht miliardave të investuara

Operatori i Sistemit të Transmetimit bëri lajmërimin e radhës sot për shkëputje të detyruara të energjisë elektrike për shkak “të një defekti të rëndë” në nënstacionin 220 kv në Tiranë. Për pasojë, pa energji elektrike janë aktualisht (sipas njoftimit) pjesa më e madhe e fshatrave të Tiranës si edhe zona të caktuara brenda qytetit. Energjia mungon në Tufinë, Kashar, Selitë, Paskuqan, Bathore, Shinat e Trenit, Unazë e re, Bërxull, zona e autostradës, si edhe fshatra të tjerë të Tiranës.

Krahas tyre, energjia do të mungojë nga ora 17.00 deri në 21.00 në Laç, Fushë-Krujë, Mamurras, Vorë, etj. Defekti ndodh në këto ditë të ftohta dimri, kur konsumi i energjisë është në nivelet 25-26 milionë kilovat në ditë. Ky mund të konsiderohet një ndër defektet më të rënda gjatë muajve të fundit në sistemin e transmetimit të energjisë.

Megjithatë, defekte të tilla janë të pajustifikueshëm në një kohë kur OST-ja ka shpenzuar qindra milionë lekë për investime në përmirësimin e rrjetit transmetues gjatë dy viteve të fundit. Referuar tabelave të investimeve, mësohet se OST-ja ka shpenzuar gjatë 2010 dhe 2011 rreth 910 milionë lekë për zgjerim kapaciteti të nënstacioneve si edhe ndërtim linjash të reja nga fondet e saj (përjashtohet linja Elbasan-Podgoricë). Pjesë e këtyre investimeve janë edhe nënstacionet e Tiranës, njëri prej të cilëve ka pësuar avari aktualisht. 

S.E.