Monika Kryemadhi: sëmundja ime u sajua nga kundërshtarët politikë

Monika Kryemadhi, në një intervistë për të përditshmen MAPO, i ka mohuar zërat e përhapur se ajo vuante nga një sëmundje e pashërueshme. Kryemadhi ka thënë se, tërheqja e saj nga jeta publike dhe studiot televizive kanë ndihmuar me përhapjen e këtij thashethemi. Ajo ka shtuar se fjalët dashakeqe janë përgatitur në “kuzhinën”  e kundërshtarëve të saj politikë. “Mbaj mend që edhe në vitin 2002, kur dha dorëheqjen nga kryeministër Iliri, nxorën një histori të ngjashme që unë isha sëmurë, që po vdisja, etj. Gjithmonë sa herë që jep dorëheqje Iliri, në fakt nxjerrin nga një histori të tillë. Është kjo lloj strategjie, e mesa duket është i njëjti sistem njerëzish që përhapin thashetheme, me të cilat duan të ndikojnë sadopak në ambientin tonë familjar për të krijuar situata të pakëndshme”, është shprehur Kryemadhi. Gjatë intervistës, politikanja e LSI-së ka folur edhe për stinën e vështirë politike të bashkëshortit, Ilir Metës, i cili ka një çështje të hapur me gjykatat lidhur me përgjimin e kryer nga ish-vartësi dhe ish-miku i tij, Dritan Prifti. Kryemadhi ka thënë se Meta “është mësuar me këto dallgë dhe se ai do t’ia dalë mbanë edhe kësaj here”.

L. A.