Dy shinat e aksionit politik të PS-së: Drejtësi për të vrarët e 21 janarit dhe drejtësi ekonomike

Në fjalën e mbajtur gjatë hapjes së Asamblesë Kombëtare të PS-së, Edi Rama ka falënderuar qytetarët shqiptarë që morrën pjesë në homazhet e zhvilluara dje në kujtim të 4 të vrarëve gjatë protestave të 21 janarit 2011. “Ne nuk do të rreshtim kurrë së kërkuari drejtësi për jetët e të pafajshmeve dhe për gjithçka të padrejtë që është bërë nga kjo qeveri,”- tha Rama. Lideri i opozitës theksoi se programi i partisë së tij e ka respektimin dhe vënien e drejtësisë në themel të vet, pasi pa drejtësi nuk mund të qeveriset.  “Shpreh mirënjohje ndaj SHBA dhe ndaj ambasadori Arvizu për angazhimin këmbëngulës të një hetimi të thellë dhe deri në fund të 21 janarit për të zbardhur të 4 vrasjet dhe për të ndëshkuar vrasësit. Për interesin kombëtar dhe publik në funksion të një shteti të mirëfilltë të së drejtës, ne nuk jemi të interesuar të dalë në dritë vetëm dora e ekzekutuesve, por të vihen përpara drejtësisë edhe urdhëruesit e tyre”, - theksoi Rama.

Në lidhje me drejtësinë në fushën ekonomike, Rama theksoi se politika e PS-së nuk është një politikë e diskriminimit, por është e vetmja politikë që sot mund të garantojë drejtësi në konkurrencë, ndershmëri dhe vlerësim të secilit sipas meritës. Ai ka kërkuar nga deputetët të nisin rrugën e sqarimit të programit qytet më qytet dhe fshat më fshat, për të komunikuar me shqiptarët, me çdo grup interesi për alternativën socialiste.

Pra, për vënien e drejtësisë në vend për të vrarët e 21 janarit, PS-ja duket se do të bazohet tek ndihma amerikane, ndërsa për vendosjen e drejtësisë ekonomike duket se do të bazohet tek aftësia e drejtuesve të saj për të bindur mjaftueshëm shqiptarë se progarami socialist është ai që mund të vendosë drejtësinë ekonomike.

E.Zaloshnja