Berisha: 21 janarin do ta hetoj unë pas largimit të puçistëve

Ju ftojmë ta ndiqni këtë intervistë të kryeministrit Berisha dhënë Alfred Pezës në Vizion Plus. Kemi hequr nëpër të pjesë të përgjigjeve, por për ta shkurtuar disi, e duke u kujdesur që të mos deformohet konteksti. Biseda tek-tuk duket surreale. Duket qartë se kryeministri është i terrorizuar nga data 21 janar. Respublica.al.

Peza: Ju keni deklaruar se vazhdoni t’i qëndroni mendimeve që keni dhënë më 23 janar të një viti më parë. Eshtë një deklaratë që në fakt më shumë është komentuar si një kërcënim për z.Edi Rama …

Kryeministri: Absolutisht asnjë kërcënim, por thjesht një qëndrim real, nga i cili nuk do të lëviz ndonjëherë.

Peza: Që do të thotë?

Kryeministri: Që do të thotë unë u rrethova njëherë me zjarr, me gurë, me hunj në zyrën tim, unë që isha kryeministri i zgjedhur në mënyre legjitime. 

Peza: Mendoni se kishte një skenar për ta marrë me dhunë pushtetin?

Kryeministri: … Në gjithë këto pesë orë [të demonstratës së 21 janarit], kryetari i opozitës u instalua në godinën përkarshi me një megafon me besimin e verbër se do të vinte dhe do të mbante fjalim nga ballkoni i zyrës sime.

Peza: E keni të saktë këtë?

Kryeministri: Absolute, shumë të saktë dhe shumë të sakta edhe gjëra të tjera; edhe për tjetrën që kishin futur armë në bodrumin e asaj ndërtese ku rrinte kryetari, tek dy kullat. Dhe... këtë e bëri me mbështetjen e fuqishme të atyre të cilët donin mandatin e dytë dhe e dinin se nga unë nuk do të propozoheshin

Peza: Presidenti i Republikës, Z. Topi…

Kryeministri: Absolutisht, me mbështetjen totale të prokurores, të presidentit,etj. dihen tashmë. Këto veprime u bënë në një koordinim makabër. Natyrisht kishte disa opsione; mund t’ua ktheja reston në mënyrën më të vendosur

Peza: Që do të thotë?

Kryeministri: Që do të thotë se mund të merrnin atë që meritonin, por interesa të tjera prevaluan, interesi që e keqja duhet zvogëluar…

Peza: Keni patur plan që edhe ta shkarkonit kryeprokuroren?

Kryeministri: Jo, ajo nuk meritonte shkarkim, ata meritonin shumë më tepër se shkarkim, sepse ata të cilët u angazhuan në një veprimtari antikushtetuese, për të rrëzuar me forcë një qeveri legjitime, për ata ligjet janë të qarta.

Peza: Pra meritonin arrestimin?

Kryeministri: Ata meritonin ligjin dhe nuk e morën ligjin. Unë ato fjalë që iu kam thënë atyre, as nuk i heq, as nuk i kam hequr dhe as nuk do t’i heq. Quaje grusht, apo quaje tentativë për përmbysje pushteti me dhunë…

Peza: Presidenti tha që unë nuk i kam qëlluar me grusht vetvetes

Kryeministri: Tani, është mirë ta lëmë këto 6 muaj, se kam vendosur që këto 6 muaj të rrijë… Kam pranuar një skemë, kam pranuar skemën e hetimit të organizatorëve, kam pranuar skemën e hetimit të vrasjeve plotësisht ...

Peza: Kjo skemë kur është negociuar, kur është rënë dakord për të?

Kryeministri: Pse se ajo nuk negocion se ajo që heton është një organizatore, është pjesë e këtij puçi

Peza: Eshtë akuzë e rëndë për Kryeprokuroren kjo...

Kryeministri: Absolute, janë të verifikuara këto. Ata të cilët organizuan këtë kishin dy skenarë: njëri ishte që natyrisht do pushtonin zyrën dhe do ishin të qetë, në variantin tjetër ishte se do më bënin rreshtore, ata e dinë. Rreshtore kryeministrit të zgjedhur me votën e lirë të shqiptarëve. 

Peza: Kush janë organizatorët kryesorë?

Kryeministri: Cili ishte motivi i 21 janarit? Ishte një shirit i transmetuar, një regjistrim në të cilin Kryeministri nëpërmjet manipulimit lidhej me një ngjarje që nuk kishte asnjë lidhje....Nuk i kam thënë z. Rama asnjë kërcënim dhe duhet ta dijë se nuk e kërcënoj kurrë, por duhet ta dijë se i qëndroj fjalës sime në mënyrën më absolute.

Peza: Në fakt nëse e lexon merret si i tillë…

Kryeinistri: Jo nuk është kërcënim, por nuk lëviz nga pozicioni im

Peza: Thoni se do të hetohet, keni parasysh këtu faktin se do të zgjidhet një president i ri dhe më pas kjo mazhorancë për shkak të mbarimit të mandatit do të zgjedhë një Prokurore ose Prokuror të ri, këtë keni parasysh me hetim?

Kryeministri: Ngjarje të tilla të rënda nuk amnistohen kurrë. Jo. Ngjarje të tilla të rënda kanë vetëm një përgjigje hetimin e plotë dhe të vërtetën në shesh.

Peza: Pra keni parasysh me këtë rihetim pas ardhjes së prokurorit të ri të përgjithshëm?

Kryeministri: Ky është një problem i rëndësishëm, është të marrë zgjidhje ligjore. Por të jesh i bindur që ato dy ditë me Bamir Topin dhe Ina Ramën janë zhvilluar, jo nga unë, dhjetëra kontakte, dhe e kanë shitur dhe blerë njeri-tjetrin ata gjatë atyre dy ditëve nja 15 herë.

Peza: Paksan qënë të përgjuar?

Kryeministri: Jo, i bindur të jesh, jo. Nuk ke për të gjetur kurrë, mbaje mend këtë, njeri që të thotë se më përgjoi Sali Berisha

Peza: Çfarë përgjegjësie ndjeni sot pas një viti për 4 të vrarët?

Kryeministri: Absolutisht, ndiej një dhimbje dhe keqardhje të madhe, por në mënyrë absolute, dhe njëherë dhe 100 herë mund të theksoj se një institucion i një vendi të lirë nuk mund të pushtohet.

Peza: Kush ka dhënë urdhër të qëllohej, keni dhënë ju urdhër apo ndonjë vartësi juaj?

Kryeministri: Në mënyrë kategorike dhe absolute as edhe një urdhër. Urdhëri ishte ky, që ta dish ti, ai që do të hynte brenda ai nuk do të mund të dilte më, i vetmi urdhër. Ligji i gardës është ky, po e gjuajte ushtarin me gur, me dru, me çdo gjë tjetër, nuk të gjuan me gur, nuk të gjuan me dru; nuk ka ushtar në botë që po ta gjuash nuk të drejton armën. 

Peza: Po thoni se katër viktimat kanë ardhur nga garda për shkak të detyrës?

Kryeministri: Jo, unë them këtë, garda ka qëlluar në zbatim të ligjit, sesi kanë ardhur viktimat kjo do jetë një proces hetimi.

 Peza: Keni deklaruar atë ditë se nga protestuesit ka pasur pistoleta armë, çadra armë.

Kryeministri: Të gjitha janë informacionet

Peza: Ka diçka që duhet të ridimensiononi pas një viti nga informacionet që keni thënë?

Kryeministri: Tani, ... në mënyrën më të padiskutueshme kurrë ndonjëherë nuk do të pranoj që kjo çështje të mos zbardhet tërësisht.

Peza: Pra ju i qëndroni deklaratës që keni thënë se ka patur njerëz me çadra-pistoletë?

Kryeministri:Unë i qëndroj informacionit që kam pasur.

Peza: Ka pasur një problem në atë kohë pas firmosjes së urdhër-arresteve për zinxhirin drejtues të Gardës dhe nuk u lejua ekzekutimi i këtyre urdhër arresteve nga ana e policisë.

Kryeministri: Jo, nuk u lejuan nga kryeministri.

Peza: Ju nuk i kini lejuar?

Kryeministri: Jo, nuk u lejuan nga kryeministri, po sigurisht. Po të urdhëroja policinë, unë ajo do të ndodhte; por a mund tua jepnim bandave ne kryeministrinë.

Peza: Ju po thoni që urdhëri për arrestimin e 6 drejtuesve të gardës ishte vazhdim i planit?

Kryeministri: Absolutisht, kryekëput.

Peza: Thuhet se pamjet që janë filmuar nga kamerat e kryeministrisë janë fshirë nga serveri qendror?

Kryeministri: Absolutisht, nuk kam asnjë dijeni se janë fshirë.... Nuk kam dijeni që të jetë fshirë qoftë edhe një segment.

Peza: Ato ditë janë parë ushtarë të gardës të marrin mjekimin brenda territorit të kryeministrisë dhe nuk janë çuar në spital?

Kryeministri: Tani, sesi e kanë rregullin ata, tani unë nuk mund të them se cila plagë shkon në spital dhe cila plagë, kjo është çështje e ekipit. E rëndësishme është se një ambulancë ka ardhur dhe i ka mjekuar.

Peza: Shihni një paralele mes 21 janarit dhe 14 shtatorit 1998?

Kryeministri: Në 12 shtator u vra Valeza i shqiptarëve, Azem Hajdari.... Dhe po t’i marrësh kështu, më 14 shtator ‘ 98 [kryeministria] ishte bosh, ndërsa me 21 janar ishte plot kryeministria, edhe Erla ishte këtu në detyrën e vet, të gjithë ishin.

Peza: Çfarë informacioni keni [që presidenca ëhstë shndërruar në partiçkë]?

Kryeministri: Ashtu, po leje tani…

Peza: Një gjë duhet të na thuash që të na bësh dhe ne të kuptojmë se është e vërtetë.

Kryeministri: Unë jam i sigurt se ti nuk e vë në dyshim këtë.

Peza: Është puna e teleshikuesve kjo, dhe jo puna ime…

Kryeministri: E kanë shprehur ata.

Peza: Ju keni thënë se janë caktuar nënkryetarët.

Kryeministri: Janë caktuar.

Peza: Kush janë?

Kryeministri: Nuk e di ti?!

Peza: Jo.

Kryeministri: Telefonoju dhe do t’i them pastaj. Janë caktuar dy nënkryetarë.

Peza: Dy nënkryetar partie?

Kryeministri: Po, dy janë. Të dy janë aty.

Peza: A janë në Presidencë?

Kryeministri: Një në Presidencë dhe një KLD, dhe kaq, e morën ata, e krijuan ata.

Peza: Po kryetari kush është?

Kryeministri: Kryetarin thanë do e bëjnë me rotacion sa të vijë Bamiri. Është kështu apo jo?

E.G.